CEBU CITY, Cebu, Oct. 28 (PIA) -- Isip pagpangandam sa umaabot nga kasaulogan sa "Kalag-Kalag" gipatuman sa Cebu Port Authority (CPA) ug Land Transportation Franchising and Regulatory Board (LTFRB) Region 7 ang "Oplan Biyaheng Ayos Undas 2022" nga molungtad gikan Oktubre 27 hangtod Nobyembre 4.

Tumong sa "Oplan Biyaheng Ayos Undas 2022" mao ang paghatag ug seguridad ngadto sa mga sementeryo, pantalan, terminal ug uban pang mga lugar, ug ang pagsiguro sa kahapsay ug kalinaw sa pagbiyahe sa mga pasahero lakip napud ang ilang seguridad sa ilang pag-uli ngadto sa tagsa-tagsa nila nga mga probinsya.

Ubos niini, ang LTFRB mipahigayon og inspection sa mga nagkadaiyang terminal sa Cebu ug tibuok Central Visayas lakip usab ang pagpahigayon ug mga vehicle inspection aron masiguro ang road worthiness sa mga sakyanan nga mobiyahe.

Samtang nag butang usab sila ug mga Malasakit Help Desk sa mga terminal nga pwedeng maduolan sa mga pasahero sa higayon nga sila manginahanglan ug assistance sa ilang pagbiyahe.

Ang LTFRB mihatag usab ug special permits sa 200 ka mga buses aron nga mas daghan pang pasahero ang makasakay alang sa umaabot nga okasyon.

Hugot usab nilang gibantayan ang pagpatuman sa mga health protocols sulod sa mga pampublikong sakyanan karon nga anaa na sa 100% ang kapasidad sa mga pasahero nga pwedeng makasakay.

Ang Cebu Port Authority sa ilang bahin, mi activate na usab sa security measures sa tanang mga pantalan nga ilang gidumala pinaagi sa pag deploy ug dugang nga mga police port officers ug security personnel.

Anaa sa 370 ka security personnel ang ilang gipakatap aron nga momando sa pagpatuman sa Oplan Biyaheng Ayos Undas.

Aduna usab silay gipangbutang nga mga Malasakit Help Desk ug mga first aid responders nga andam moabag sa mga pasahero.

Gibutyag usab sa CPA nga ang operasyon sa tanang mga pantalan molungtad ug 24 oras matag adlaw kung diin ilang gilauman nga moabot sa 300,000 ka mga pasahero ang mobyahe alang sa "Kalag-Kalag" karong tuiga. (RGC/PIA7 Cebu)