SAN JOSE, Antique (PIA) -- Nagpasarig kang bulig ang pira ka mga miyembro kang gabinete ni Presidente Ferdinand Marcos, Jr. sa anda pagbisita sa probinsiya kang Nobyembre 2.
Ginpadara kang Presidente ang mga opisyal para mag-tambong sa sangka briefing kang Provincial Disaster Risk Reduction and Management Council (PDRRMC) kag mag-patigayon kang aerial inspection sa kahalitan kang bagyong "Paeng" sa Antique.
Ang mga cabinet secretary nga nag-abot ginalakipan nanday Department of the Interior and Local Government (DILG) Secretary Benjamin "Benhur" Abalos Jr., Department of Public Works and Highways (DPWH) Secretary Manuel M. Bonoan, Department of Social Welfare and Development (DSWD) Undersecretary Alan A. Tanjusay, Department of National Defense OIC-Secretary Jose Faustino, Jr., kag Office of Civil Defense (OCD) Administrator Undersecretary Raymundo B. Ferrer.
Hambal ni Abalos, nagpadulong sanda sa probinsya bangod sa direktiba ni Presidente Marcos kag para usisa-un ang mga kinahanglanon kang mga Antiqueños para sa anda pagbangon.
Samtang, ginpasarig man ni Bonoan nga padayon ang mga tikang kang DPWH para mabalik sa normal ang pagbiyahe sa probinsya, kapin pa sa Paliwan Bridge nga sangka prayoridad suno sa opisyal.
Padayon man ang pagkay-ad sa pira ka mga bahin kang Antique (Hamtic)-Iloilo (San Joquin) national road nga nag-usmod.
Dara kang pagkaguba kang mga karsada kag taytay, mabudlay ang pagpasulod sa Antique kang relief goods kag iban pa nga mga kagamitan.
Gani, suno kay Faustino, anda pagaistoryahan kang Armed Forces of the Philippines (AFP) ang pagpadara kang sangka barko kang navy sa probinsya para magbulig sa relief operations.
Dugang na pa nga ang gobyerno nasyonal handa magtugro kang mga kinahanglanon kang Antique sa tunga kadyang kalamidad.
Ang mga cabinet secretary gin-abi-abi nanday Governor Rhodora Cadiao kag Antique Lone District Representative Antonio Agapito Legarda, Jr, kaimaw ang pira ka mga opisyales kang gobyerno probinsyal kag mga municipal mayor. (AAL/BPS/PIA Antique)
