SYUDAD SANG ROXAS, Capiz (PIA) -- Ginhingyo ni Gobernador Fredenil Castro sa mga katapu sang gabinete ni Pangulong Fredinand "Bongbong" Marcos, Jr. nga ipaabot sa President ang madugay na nga ginapangayo sang mga Capiznon nga "floodway" nga proyekto bilang sabat sa problema sa pagbaha sa probinsya.

Nahibaluan nga ginpadala sang Presidente sa Capiz sadtong Nobyembre 2 sanday Sec. Benjamin Abalos, Jr. sang Department of the Interior and Local Government, Sec. Manuel Bonoan sang Department of Public Works and Highways, Sec. Jose Faustino, Jr. sang Department of National Defense, Undersecretary Alan Tanjusay sang Department of social Welfare and Development kag admnistrator Raymundo Ferrer sang Office of Civil Defense agud nga maghibalo sa mga kahalitan sang Severe Tropical Storm Paeng sa probinsya subongman magdul-ong sang kinahanglanon nga bulig sang mga pamilya nga apektado sang baha bangud sa bagyo.

Samtang, kapin sa 365 sa kabilogan nga 473 ka mga kabaranggayan sa probinsya ang naapektuhan sang tubig baha bangud sang bagyo Agaton nga nagtulod sa kapin 52,392 ka mga pamilya ukon 215,890 ka mga indibidwal nga magbakwit ukon magpadulong sa mga evacuation center kag mas luwas sa katalagman nga mga lugar.

Ang tubig baha naman nga dala ni bagyo Paeng ang nag-apekto sang 270 ka mga kabaranggayan.

Ang problema sa pagbaha, sunu sa mga natungdan nga otoridad sa interview sa media, ang resulta sang nagagamay nga naganabaw bangud sang bun-od sa alagyan sang tubig kag nagapagamay nga "forest cover" ukon kakahoyan sa probinsya. (JBG/AAL/PIA Capiz)