TAGBILARAN CITY, Bohol, Nov. 7 (PIA) -- Nagsugod na niadtong Nobyembre 1, 2022, ang implementasyon sa mga sumbanan ug mga dugang benepisyong ihatag sa gobyerno sa mga solo parent ubos sa Expanded Solo Parent Welfare Act.

Ang Republic Act No. 8972 o Solo Parents Welfare Act of 2000 nagtinguhang matabangan ang mga solo parent nga nag-inusarang gibuhi ang iyang anak o mga anak nga may edad 18 anyos paubos. Ubos niining balaod, hatagan og “parental leave” ang solo parent nga empleyado gawas pa sa 7 ka adlaw nga regular leave benefits kun siya niabot na og 1 ka tuig sa gi-trabahuan nga ahensya o organisasyon.

Ang usa  ka solo parent nga mokita og dili motaas sa P250,000.00 matag tuig makadawat usab og 10% diskwento ug exempted sila sa value added tax sa mga produktong pang bata sama sa gatas, food and micronutrient supplements, diaper, tambal, bakuna, ug uban pang medical supplements gikan sa pagkahimugso sa anak hangtod sa pagtungtong niini sa 6 anyos.

May automatic coverage usab ang mga solo parent sa National Health Insurance Program (NHIP) sa Philippine Health Insurance Corporation (PhilHealth).

Gawas niini, gimanduan usab ang Department of Education (DepEd), Commission on Higher Education (CHED), ug Technical Education And Skills Development Authority (TESDA) sa paghatag og scholarship programs alang sa mga qualified solo parents ug  full scholarship alang sa usa ka anak nga dili moubos sa 22 anyos ang edad.

Kun ang solo parent adunay kapin sa usa  ka anak, ang iyang ubang anak mahimong prayoridad alang sa grant-in-aid programs o student loans.

Ang usa  ka ginikanan makonsidera nga solo parent kun sila adunay kustodiya sa ilang anak o mga anak nga may edad 22 anyos paubos ug nahisulod sa mga mosunod nga mga kategorya: biyudo/biyuda; buwag sa asawa; annulled ang kasal; nabilanggo o nahukmang mabilanggo; adunay mental o pisikal nga pagkabaldado ang asawa/partner; bisan kinsang indibidwal nga mibarug isip ginikanan sa usa  ka bata/mga bata; wala gikasal nga gipiling padak-on ang anak nga nag-inusara; gibiyaan sa asawa/partner; mga ginikanan nga nanganak nga biktima sa pagpanglugos; ug bisan kinsang miyembro sa pamilya nga nibarug isip head of the family bunga sa pag-abandona, pagkawala, o dugay nga pagkawala sa mga ginikanan o sa solo parent.

Ang bisan kinsang solo parent nga nanginahanglan og tabang o gustong mo-avail sa mga benepisyo mahimong mobisita sa buhatan sa City/Municipal Social Welfare and Development Office (C/MSWDO) diin nahisakop ang ilang gipuy-an.

Ang mga dokumento ug impormasyon nga gihatag sa aplikanteng solo parent i-assess og social worker gikan sa C/MSWDO.

Susihon kini aron matumbok ang mga gikinahanglang programa ug mahimong ihatag nga suporta o tabang sa gobyerno sa aplikante. (ECB/PIA7 Bohol)