TAGBILARAN CITY, Bohol, Nov. 14 (PIA) -- Misaad si Presidente Ferdinand “Bongbong” R. Marcos Jr. niadtong Domingo nga palig-onon ang panaghiusa tali sa Department of Foreign Affairs (DFA) ug sa bag-ong natukod nga Department of Migrant Workers (DMW) aron mahatagan og tabang sa tukmang panahon ang mga Pilipino nga anaa sa kalisdanan.

“Sa pagtutulungan ng DFA, sa pangunguna ni Kalihim Enrique Manalo at ng pinakabagong ahensya ng ating administrasyon… ang tawag ay DMW, the Department of Migrant Workers na pinangungunahan ni Kalihim Toots Ople, lalo nating pag-iigtingin ang tambalang ito upang makapagbigay ng mabilis at karampatang serbisyo at tulong sa mga overseas Filipinos na nangangailangan ng tulong,” matud pa ni Presidente Marcos sa iyang pakigpulong atol sa iyang pakigtagbo sa Filipino community sa nasod sa Cambodia.

Matud pa sa Pangulo nga gihatag sa gobyerno ang gikinahanglan nga tabang sa kataas sa pandemya sa coronavirus, ug kini gihimo pinaagi sa koordinasyon tali sa DFA, Philippine Overseas Employment Administration (POEA) ug Overseas Workers Welfare Administration (OWWA).

Atol sa pagbisita sa OWWA Welfare Officer sa Cambodia sa miaging tuig, ang welfare assistance gitunol sa mga OFW nga nagpaabot sa pagpauli kanila sa Pilipinas, dugang sa suporta nga gihatag sa DFA Assistance to Nationals (ATN) Fund.

Matud pa sa Presidente, ang gobyerno nagpahigayon og medical repatriations ug mihatag usab og tabang pinaagi sa Legal Assistance Fund, nga naghatag og Khmer-speaking nga mga abogado sa mga Filipino nga nag-atubang og legal nga problema sa Cambodia.

Kapin sa 10 ka milyon nga mga Pilipino ang nagpuyo ug nagtrabaho sa lain-laing mga bahin sa kalibutan, lakip ang mga naa sa Cambodia.

Base sa datos sa Philippine consulate sa Cambodia, adunay kapin sa 5,000 ka mga Filipino nga nagpuyo ug nagtrabaho sa nasud, kadaghanan kanila mga English teacher ug supervisor sa clothing and apparel factory ug casino. (ECB/PIA7 Bohol)