MALAYBALAY CITY, Bukidnon (PIA)—Malipayong gidawat sa 77 ka mga kanhing rebelde ang cash assistance nga mokabat sa P4.337 million gikan sa Department of the Interior and Local Government (DILG) ubos sa Enhanced Comprehensive Local Integration Program kon E-CLIP niadtong Nobyembre 4, sa 403rd ‘Peacemaker’ Brigade, Camp Osito Bahian ning syudad.

Ang seremonya sa pag-apod-apod sa assistance naglakip sa pag-turnover sa mga armas, pag-release sa livelihood assistance, immediate assistance, ug reintegration assistance.

Dunay pito ka firearms ang gi-turnover ngadto sa ECLIP committee alang sa firearms remuneration.

Apil usab sa programa ang pagpanumpa sa mga kanhi rebelde sa ‘Oath of Allegiance’ nga gipangulohan ni 403rd Bde Commander Col. Ted Dumosmog, diin nanumpa ang mga kanhi rebelde nga mosuporta sila sa gobyerno.

Sa mensahe ni Provincial Exec. Asst. Atty. Romwell Roque, isip representative ni Gov. Rogelio Neil Roque, mipasalamat siya sa mga former rebels (FRs) kon mga kanhi rebelde diha sa ilang balik nga pagsalig sa gobyerno.

“Today is another special day. Angay nato hatagan og pagtagad kini nga panagtigum tungod kay karong adlawa, maghatag nasad ta’g assistance sa atong mga igso-on nga mibalik na sa sabakan sa gobyerno. Salamat sa inyong pagsalig balik sa gobyerno. Pinaagi sa atong mga igso-on nga FRs, mapakita nato sa katawhan nga wala sila gibiyaan sa gobyerno. Daghang salamat kaninyo. Tungod sa inyong desisyon nga mobalik, molambo ug samot ang atong komunidad kay naa na man ang kahapsay ug kalinaw,” miingon si Roque.

Tungod niini, gipahayag ni Col. Dumosmog nga ang Bukidnon Task Force to End Local Communist Armed Conflict (BukTF-ELCAC), pinaagi sa E-CLIP ug Amnesty Cluster, kanunay andam alang sa paghatag serbisyo aron mapadali ang tabang nga gisaad sa gobyerno niadtong mibalik na sa sabakan sa balaod.

“Kabalo ko nga naa pa moy mga amigo ug kauban nga hangtud karon naa pa sa bukid nga wala pa kasabot ug wala pa nakakita kung asa gyud ang tinuod nga dalan nga naay kalambuan, kahusay, ug kalinaw. Palihog lang ayaw lang i-hunghung, i-singgit gyud sa ila nga naa na mo sa sabakan sa balaod ug nagpuyo namo sa normal nga kinabuhi. Tungod niini, naa pay ihatag ang atong gobyerno nga mga assistance aron gyud matabangan mo,” matud ni Dumosmog.

Samtang gipasalamatan usab ni Wilson Anglao, ang secretary-general sa Karapatan-Bukidnon, diin matud niya nga nabati nila ang tabang sa gobyerno.

“Dako na kaayo ang among kalambo-an sukad sa among pag-surrender ug pagbalik sa sabakan sa gobyerno kay among nakita karon nga nindot na among dalan unya daghan tabang gikan sa Department of Agriculture. Isip mga farmers pud sa among community, nalipay mi. Busa daghan gyud kaayong salamat sa gobyerno kay gihatagan gyud mi ug pagtagad,” dugang ni Anglao. (BGE/PIA-Bukidnon)