Nanari-sari nga pagkaon kag gamit ang pwede pili-an kang publiko sa Fiesta Binirayan, samtang tuyo ipakilala kang Binirayan Turismo ang mga lugar sa probinsya nga pwede bisitahan kang mga turista.

Ang dya nga mga aktibidad ginsundan kang pagpasiga kang Christmas lights kag fireworks display, kag pabukas kang Tanuman Festival sa Evelio B. Javier (EBJ) Freedom Park nga ginpangunahan nanday Governor Rhodora Cadiao kag Binirayan 2022 Executive Committee chair kag Sangguniang Panlalawigan (SP) Member Dante Beriong.

Gin-agda man kang gobernadora ang publiko nga padayon nga mag-uligmat kontra COVID-19 kapin pa nga face-to-face ron ang pagselebrar kang Binirayan Festival.

Pira sa mga highlights nga naka-linya halin Disyembre 19 tubtob 21 ang Maragtas kang Pagpasad, Parada kang mga Balangay, Lin-ay kang Antique, Pasundayag kang Duna nga Kultura kang DepEd Antique, Pasundayag kang Duna nga Kinaadman kang opisina ni Cong. Antonio B. Legarda, Jr., kag Malay-Ati Competition.

Gin-sponsoran man kang Anakalusugan Party-list ang banda nga "Mayonnaise" nga magapadulong sa probinsya sa pagtakop kang Binirayan Festival sa Disyembre 21. (AAL/BPS/PIA Antique)