TAGBILARAN CITY, Bohol, Nov. 23 (PIA) -- Giila ni Presidente Ferdinand “Bongbong” Marcos Jr. ang aktibong pagtubag ug epektibo nga liderato sa mga local government units (LGUs) taliwala sa COVID-19 pandemic ug uban pang mga hagit.
Personal nga gisaksihan ni Marcos ang 2022 Galing Pook Awards nga gipahigayon sa Ceremonial Hall sa Palasyo sa Malakanyang, adlaw’ng Martes, Nobyembre 22.
“As your President, I’m deeply encouraged by the effective leadership we now see shining brightly amongst our LGUs (Isip inyong Presidente, nadasig ko pag-ayo sa epektibong liderato nga atong nakita karon nga nagdan-ag sa atong mga LGU,” pahayag pa ni Marcos.
Matud pa niini nga ang tanan nakabenepisyo gikan sa aktibo nga pagtubag ug dali nga paghatud sa mga serbisyo sa mga LGU sa mga tuig sa pandemya.
Pinaagi sa mga LGU, ang Presidente miingon, ang tinuod nga sitwasyon ug ang mga panginahanglan sa mga anaa sa grassroots level naila.
Naglaum ang Presidente nga ipadayon sa LGUs nga ihatag ang tanan nilang makaya sa pagpadayon sa new normal.
Misaad si Marcos nga suportaan sa iyang administrasyon ang LGUs tungod kay mahinungdanon ang papel nila pag-abot sa mga inisyatibo sa nation-building initiatives.
Ang Presidente nagkanayon nga ang Galing Pook usa ka nag-unang institusyon nga kahinguhaan nga nag-ila, nagpalihok ug nagpasiugda sa kabag-ohan, pagpadayon, paghatag gahum sa mga lungsuranon ug kahusayan sa lokal nga pagdumala ug gihatagan og gahum sa gatusan ka mga LGU aron mapalambo ang mga programa ug sosyal nga mga inobasyon pinaagi sa Galing Pook Awards, Galing Pook Academy ug Galing Pook Advocacies.
Gitumbok niini ang panginahanglan sa paghatag og gibug-aton sa kamahinungdanon sa pagpalig-on sa panagtambayayong tali sa gobyerno ug pribadong organisasyon.
Gipahalipayan sa Presidente ang mga Galing Pook awardees sa pagporma ug pagpatuman sa mga programa nga naghatag ug mga bag-ong solusyon sa komon nga mga problema sa katilingban.
Matud pa sa Presidente nga ang pag-ila a sa mga lungsod ug munisipalidad naghatag og inspirasyon kanila nga hingosgan ang ilang tumong nga mas mapaayo pa ang ilang ginahimo. (ECB/PIA7 Bohol)
