TAGBILARAN CITY, Bohol, Nov. 24 (PIA) -- Gipahinumdoman sa Department of Labor and Employment (DOLE) ang mga employer nga bayran ang mandatory 13th month pay sa ilang mga kawani sa dili pa mag-Disyembre 24.

Sa usa  ka pahayag, miingon si DOLE Kalihim Bienvenido Laguesma nga ang mga employer sa pribadong sektor gimanduan nga magbayad og benepisyo sa ilang mga kawani nga katumbas sa usa  ka buwan nga sweldo.

“There is no exemption, no deferment. We recognize employers are still struggling. But according to the law, there is no exemption for the 13th month pay (Walay exemption, walay deferment. Atong giila nga ang mga amo naglisod gihapon. Apan subay sa balaod, walay exemption ang 13th month pay),” matud pa ni Laguesma.

Apan matud pa usab sa Kalihim nga ang mga employer ug empleyado adunay katungod o prerogative nga mohimo og mga espesyal nga kahikayan alang sa pagbayad sa benepisyo.

Ubos sa Presidential Decree 851, ang mga employer sa pribadong sektor kinahanglang bayaran ang 13th month pay sa ilang mga regular nga empleyado.

Nahisulod sa benepisyo sa trabaho ang mga rank-and-file nga empleyado sa pribadong sektor.

Matud pa sa DOLE, may katungod ang mga trabahante sa 13th month pay bisan unsa ang ilang posisyon, pagkatudlo, o status sa pagtrabaho, ug unsa man ang paagi kun giunsa gibayran ang ilang mga sweldo, sa kondisyon nga sila nagtrabaho nga dili moubos sa usa  ka buwan sulod sa tuig sa kalendaryo. (ECB/PIA7 Bohol)