TAGBILARAN CITY, Bohol, Dec. 5 (PIA) -- Gikonsiderar sa gobyerno ang pagtukod og mga high-rise housing units aron matubag ang kasamtangang problema sa nasud ug makaapas sa nagkataas nga panginahanglan alang sa disenteng kapuy-an, si Presidente Ferdinand R. Marcos Jr. miingon niadtong Disyembre 5.

Namulong atol sa ceremonial turnover sa mga house and lot units gikan sa National Housing Authority (NHA) sa Naic, Cavite, si Presidente Marcos niingon nga adunay kakuwang sa mga 3.5 milyon ka mga housing units sa dihang senador pa siya.

Sa iyang pag-asumir sa pagkapresidente, ang kakuwang sa mga housing units nikabat na sa 6.5 milyon, base sa banabana sa gobyerno, matod ni Marcos.

Gibutyag pa sa Presidente nga ang gobyerno mahimong mosundog sa proyekto sa iyang mga ginikanan nga sila anhing Presidente Ferdinand Marcos Sr. ug kanhi Unang Ginang Imelda Marcos nga Bagong Lipunan Improvement of Sites and Services (BLISS) nga gisulay paghatag sa mga kabus sa syudad alang sa ilang kaugalingong mga balay ug mga lote.

Ang proyektong BLISS, nga nagsugod niadtong 1981, ubos sa pagdumala sa inahan ni Marcos, kinsa mao usab ang kadungan nga Minister of Human Settlements kaniadto.

Gipasiugda ni Marcos ang importanteng papel sa Department of Human Settlements and Urban Development (DHSUD) sa pagtabang sa NHA sa pagsiguro nga ang mga balay nga gitukod alang sa mga kabus duol ra sa ilang panginabuhian.

Nangita og paagi ang gobyerno sa pag-organisa sa lain-laing entidad sama sa local government units (LGUs), Department of Human Settlements and Urban Development (DHSUD), NHA, lehislatura, ug ang nasudnong kagamhanan aron mangita og solusyon sa nagkadako nga panginahanglan sa nasud alang sa dugang mga puy-anan, dugang pa sa Pangulo. (ECB/PIA7 Bohol)