TAGBILARAN CITY, Bohol, Dec. 1 (PIA) -- Ipadayon og balik sa Commission on Elections (Comelec) ang voters’ registration alang sa local ug overseas voters sugod sa Disyembre 12, 2022 hangtod Enero 31, 2023.

Alang sa local voter registration, ang mga kwalipikadong botante mahimong moduso sa ilang documentary requirements ug magpakuha og biometrics data sa Office of the Election Officer (OEO) o bisan asang satellite registration site nga adunay hurisdiksyon sa ilang residente.

Gawas sa filled-out form, ang mga aplikante angay usab magpakita ug moduso og proof of identity nga gitugot sa Comelec o sa gipanumpaang affidavit of identification.

Mahimong moadto ang mga magparehistro sa buhatan sa election officer o satellite registration sites sa ilang lugar gikan Lunes hangtod Sabado, apil ang holidays, matag alas-8 sa buntag hangtod alas-5 sa hapon.

Alang usab sa overseas voters nga gustong mosalmot sa 2023 Barangay ug Sangguniang Kabataan Elections (BSKE), matud pa sa Comelec nga kinahanglan nilang i-transfer ang ilang registration record gikan sa overseas paingon sa lokal hangtod sa Enero 31. (ECB/PIA7 Bohol)