DAVAO CITY - Gitapok sa Overseas Workers Welfare Administration (OWWA) Davao Region ang 80 ka mga lider gikan sa nagkadaiyang grupo sa Overseas Filipino Workers family circle sa rehiyon pina-agi sa mga OFW Family Circle ug OFW Desk Officer.
Mismo si Carmelo Elaya, Officer-in-Charge sa OWWA, ang nanguna sa maong tigom alang sa mga lider sa OFW family circle nga gimugna dili palang dugay sa usa ka hotel dinhi sa dakbayan.
Dugang pa ni Elaya, gipahigayon ang maong tigom aron mapormal ang mga proseso ug mahibal-an kung unsa ang mga kinahanglan aron mamahimong usa ka lider.
Usa usab sa mga topiko nga gihisgutan sa maong tigom ang nuances sa leadership, training kabahin sa leadership development, ug pagpa-ambit sa lain-laing mga maayong gawi tali sa nagkadaiyang OFW family circle groups.
Ang OFW family circle usa ka community-based organization sa Davao region, sa mga nagkadaiyang municipality ug mga barangay nga naga suporta sa mga programa ug pamilya sa OFW nga nanimuyo sa ilang komonidad. (PIA/ETIsidro)
Panagtapok sa 80 ka mga lider sa nagkadaiyang Overseas Filipino Workers family circle groups sa rehiyon sa pagpanguna sa Overseas Workers Welfare Administration (OWWA) Davao Region.
