TAGBILARAN CITY, Bohol, Dec. 27 (PIA) -- Niisyu na ang Department of Labor and Employment (DOLE) sa mga lagda sa sweldo alang sa holidays nga gideklarar sa Disyembre 24, 25 ug 26.
Ubos sa kasamtangang pay rules, adunay lain-laing mga polisiya nga ipatuman sa Disyembre 24 (special working day), Disyembre 25 (regular holiday), ug Disyembre 26 (special non-working day).
Alang sa trabaho nga gihimo sa usa ka gideklarar nga espesyal nga adlaw sa pagtrabaho, sama sa Disyembre 24, ang usa ka empleyado adunay katungod lamang sa iyang inadlaw nga sweldo.
“No premium pay is required since work performed on said day is considered work on an ordinary working day (Walay premium pay ang gikinahanglan kay ang trabaho nga gihimo sa maong adlaw gikonsiderar nga trabaho sa ordinaryo nga adlaw sa trabaho)," matud pa sa DOLE.
Alang sa trabaho nga gihimo kaniadtong Disyembre 25, ang DOLE nag-ingon nga ang empleyado pagabayran sa kinatibuk-an nga 200 porsyento sa iyang sweldo alang sa maong adlaw.
Ug kun ang trabaho gihimo atol sa regular holiday nga natunong usab sa iyang adlaw sa tigpahulay, bayran siya og dugang 30 porsiyento sa iyang sweldo nga 200 porsiyento; ug dugang 30 porsyento sa iyang hourly rate sa maong adlaw alang sa overtime nga trabaho.
Kun wala motrabaho ang empleyado, suholan siya og 100 porsiyento sa iyang sweldo alang nianang adlawa, matud pa sa DOLE.
Ug alang sa trabaho nga nahimo kaniadtong Disyembre 26, ang departamento sa pamuo nag-ingon nga ang mamumuo pagabayran ug dugang nga 30 porsyento sa iyang sweldo sa unang walo ka oras nga pagtrabaho, ug dugang nga 30 porsyento sa iyang inoras nga rate sa giingon nga adlaw alang sa overtime nga trabaho.
Alang sa trabaho nga gihimo sa usa ka espesyal nga adlaw nga wala’y trabaho nga natunong usab sa iyang adlaw sa pagpahulay, siya pagabayran og dugang nga 50 porsyento sa iyang sweldo sa unang walo ka oras nga pagtrabaho, ug dugang nga 30 porsyento sa iyang inoras nga rate sa maong adlaw alang sa overtime nga trabaho.
Kun ang empleyado wala nagtrabaho, ang 'no work, no pay' nga prinsipyo ang magamit gawas kun adunay pabor nga polisiya sa kompanya, praktis o collective bargaining agreement (CBA) nga naghatag bayad sa usa ka espesyal nga adlaw nga wala’y trabaho, segun sa DOLE.
Ang Proclamation No. 1236 nagdeklarar sa Disyembre 24 (Bisperas sa Pasko) isip espesyal nga adlaw sa trabaho, samtang ang Disyembre 25 (Adlaw sa Pasko) usa ka regular holiday.
Sa laing bahin, gideklarar sa Proclamation No. 115 ang Disyembre 26 (Adlaw human sa Pasko) isip espesyal nga adlaw nga walay trabaho. (ECB/PIA7 Bohol)
