MALAYBALAY CITY, Bukidnon (PIA)—Misaad si President Ferdinand R. Marcos Jr. nga mohatag og dugang proyekto sa tibuok nasod aron maabot ang usa ka milyon nga housing units matag tuig nga target sa iyang administrasyon.

Gipangunahan niya niadtong Desyembre 21 ang Groundbreaking Ceremony sa Palayan City Township sa Pambansang Pabahay Para sa Pilipino Program sa Department of Human Settlements and Urban Development (DHSUD) sa Nueva Ecija diin 44 ka tower nga dunay mga 11,000 ka units ang pagatukuron. 

Ang 11 ka ektarya nga nahimutang sa barangay Atate dunay usa ka housing community nga naay mga pasilidad aron mapadali ang ekonomikanhon nga mga kalihokan sa mga target nga benepisyaryo.

Sa iyang pakigpulong, gibutyag ni Marcos ang plano nga magtukod og minilyon nga housing units sa umaabot nga mga tuig, partikular na sa sulod ug palibot sa Metro Manila, aron matubag ang problema sa ‘pabahay’ pinaagi sa paghatag ug kapuy-an sa mga pamilyang Pilipino.

“I’m glad that we are continuing this [housing program] and I know that it will not be the last. We will continue to break ground in different parts of the country para yung pangarap na one million homes a year ay pagka-naabot natin yun at least napakalaking bagay na iyan na mabigyan ng solusyon ang problema sa pabahay ng ating mga kababayan. Huwag nating lulubayan, ipagpatuloy natin at natitiyak ko naman na magagawa natin ang kailangan nating gawin para sa serbisyo para sa ating mga kababayan,” miingon siya. 

Gihatagan og gibug-aton sa Presidente ang Groundbreaking Ceremony isip usa ka testamento sa pasalig sa gobyerno sa pagtukod og mga balay alang sa mga target nga benepisyaryo niini.

“Mabuti na lang at nabigyan ako ng pagkakataon na makasama kayong lahat sa groundbreaking natin. Ito ay nagpapatunay lamang ang aming tuluy-tuloy na ginagawa para magpabahay sa milyun-milyong Pilipino na hanggang ngayon ay wala pang sariling tirahan,” dugang niya. 

Gipasalamatan ni Marcos ang DHSUD ug ang kagamhanan sa dakbayan sa Palayan sa pagsuporta sa bag-ong kalambo-an.

Gi-awhag usab niya ang publiko nga suportahan ang kampanya sa gobyerno nga nagtinguha sa pagtukod og luwas ug komportable nga mga balay alang sa mga pamilyang Pilipino. (BGE/PIA 10-Bukidnon)