DAVAO CITY (PIA) - Gipadali sa Bureau of Customs (BOC) Collection District XI ang pag-apud-apod sa mga gi-abandonar nga Balikbayan boxes ubos sa ilang hurisdiksyon pinaagi sa Port of Davao ug Sub-Port of Dadiangas.

Buot sa BOC nga mahupayan ang kahimtang sa mga Overseas Filipino Worker (OFWs) ug sa ilang mga pamilya nga nabiktima sa wala'y prinsipyo nga mga consolidator.

Matud pa ni Atty. Erastus Sandino B. Austria, District Collector, kini subay sa mando ni Presidente Ferdinand Marcos, Jr. ngadtu kay Customs Commissioner Yogi Filemon Ruiz sa padayon nga proyekto sa tibuok nasud sa tanang Customs Collection Districts.

Dugang pa niya, sa Davao ug sa Dadiangas, makuha ang mga box gikan Lunes hangtud Biyernes, sugod alas otso sa buntag hangtud alas singko sa hapon, nga gisugdan niadtong December 27, 2022. 

Ang Balikbayan boxes sa Port of Davao ma-claim sa Panabo Bypass Road, Brgy. Cagangohan, Panabo City, samtang sa JJM Warehouse, Banisil, Brgy. Tambler, Gen. Santos City ang sa Sub-Port sa Dadiangas.

Dugang pa ni Austria nga walay pagadawaton nga bayad, apan tanang claimants kailangan mo-presenter og duha ka valid government-issued IDs, dokumento pamatuod sa pagpadala, kopya sa pasaporte sa nagpadala, ug sulat nga nagtugot sa ilang representante nga mo-claim sa mga kahon.

Sa dugang kasayuran alang sa Port of Davao, mag-adtu sa BOC Facebook page www.facebook.com/bocdavao o tawag sa (082) 224-9691 o sa  (082) 223-1258. Alang sa Sub-Port of Dadiangas, tan-awa sa Facebook page www.facebook.com/dadiangasboc o tawag sa (083) 552-8890/083) 552-2941. (PIA-XI/ETIsidro with reports from BOC)