MALITBOG, Bukidnon (PIA)--Nagdala og bag-ong pagla-um ang bag-ong tuig tungod kay ang 12 ka mga kanhi rebelde ubos sa ‘Hinanaling Tabang’ sa 16th Infantry (Maglilingkod) Battalion nakadawat og livelihood starter kits gikan sa Department of Labor and Employment–Region 10 (DOLE-10) sa pakigtambayayong sa Malitbog local government unit (LGU), Enero 6. 

Matag usa kanila nakadawat sa tag P30,000 nga kantidad sa livelihood starter kits para sa Rice Trading nga gihatag pinaagi sa DOLE Integrated Livelihood Program (DILP).

Ang DILP usa sa mga programa sa DOLE nga nagsuporta sa pagpatuman sa Executive Order No. 70 (EO 70) sa pag-institutionalize sa Whole-of-Nation Approach nga nagtumong sa pagtabang sa mga ‘marginalized groups’ pinaagi sa paghatag ug malungtarong kita.

Si Gergie Liponhay aka Jayto, kanhi commander sa New People’s Army (NPA) ug usa sa mga nakadawatsa maong tabang, nipadayag sa iyang pasalamat sa gobyerno ug nag-awhag sa iyang kanhing mga kauban nga mobiya na sa armadong pakigbisog ug mopahimulos sa serbisyo nga gikan sa gobyerno.

“Kami nagpasalamat ug dako sa gobyerno tungod kay nagpakabana sila sa amo. Tungod kay naa nay presensya ang gobyerno, dili nami mobalik sa bukid. Gi-awhag namo ang among mga kauban nga naa pa karon sa kabukiran nga mana-og na tungod kay dili kita pasagdan sa atong gobyerno," panawagan ni Liponhay.

Ang ‘Hinanaling Tabang o Dinalian nga Tabang’ sa 16th Infantry Battalion maoy usa sa labing maayong gawi sa unit nga nagsilbi sa mga kanhi rebelde pinaagi sa paghatag ug kapuy-an ug akomodasyon, sustento sa pagkaon, livelihood packages, ug pagpadali sa ilang pagpalista sa Enhanced-Comprehensive Local Integration Program kon E-CLIP.

Uban sa padayon nga panawagan alang sa kalinaw, ang 16IB padayon nga nakigtambayayong sa lain-laing ahensya sa gobyerno aron matabangan ang mga kanhing rebelde nga magsugod ug mahiusa pag-usab sa katilingban. (BGE/PIA-10/Bukidnon)