TUBOD, Lanao del Norte (PIA) -- Muaabot sa 3,000 ka pamilya o kapin 8,000 ka mga indibidwal sa Tubod nga naapektuhan sa grabe nga pagbaha niadtong Enero 2 ang nahatagan og relief assistance.
Gikan sa local government unit (LGU) sa tubod ug uban pa nga stakeholders ang relief goods nga bugas, noodles, canned goods, tubig ug ginamit nga sinina.
Nakadawat usab ang mga pamilya nga walay balay og mga materyales aron matukod ang ilang mga panimalay sa mas luwas nga lugar.
“Nakadistribute na kita kulang-kulang sa 8,000 nga tao or 3,000 households kapin ug panandalian nga pagkaon o magamit sa inadlaw. Dunay homeless na pamilya, ato pod sila naprovide-an ug mga ginagmay materials para makabarog balik sa ilang puluy-anan pero dili na same area. Gibalhin nato sila sa medyo habog-habog na lugar,” matod ni Tubod Mayor Dionisio “Jimmy” Cabahug Jr.
Gipasalamatan usab ni Cabahug ang mga indibidwal, grupo, organisasyon ug LGU Nunungan sa pagdonar og mga relief goods, ginamit nga sinina ug uban pang suporta alang sa mga pamilya nga naapektuhan sa baha. Nagpasalamat usab siya sa mga responder ug rescuers atol sa baha.
Gihatod sa LGU ang mga relief goods ngadto sa mga apektadong barangay kay nakauli na sila gika nsa evacuation center.
Samtang, gidasig ni Acting Municipal Social Welfare and Development Officer Jouliet Oraiz ang mga residente nga dili mawad-an ug paglaom nga makabangon.
“Sa katawhan sa Tubod, ayaw kamo kawala ug paglaom kay there is hope nga naghatag ang Ginoo kanato nga kusog nga atong malagpasan ang in ani nga (kahimtang). Ang ako lang dili lang ta magkumpyansa, magmonitor lang jud gihapon ta kung unsa ang madawat nga pahibalo, abtik kita nga murespond para dili mudako ang unsa may madangatan sa atoa,” sumala ni Oraiz.
Base sa datos sa Regional Disaster Risk Reduction and Management Council-10 as of 3:00 am, Lunes, niabot na sa 6,881 ka pamilya o 25,142 ka indibidwal ang apektado sa pagbaha sa mga lungsod sa Baroy, Kapatagan, Kolambugan, Lala, Magsaysay, Munai, Salvador, Tangcal ug Tubod. (LELAntonio/PIA-10/Lanao del Norte)
