TAGBILARAN CITY, Bohol, Jan. 5 (PIA) -- Tulo ka komunidad sa mga mananagat sa mga isla sa Ubay maoy unang natumbok nga mga benepisaryo sa tabang pinsansyal sa Embahada sa Peoples Republic of China dinhi sa Pilipinas.

Ang tulo ka komunidad mao ang komunidad sa isla sa Guintaboan, Cuya ug Tintinan, ug kadtong matumbok pa nga mga komunidad human kining tulo mahatagi.

Kahinumduman nga ang Embahada sa Peoples’ Republic of China (PROC) mitunol ngadto sa lalawigan sa Bohol pinaagi ni Gobernador Erico Aristotle Aumentado sa P15M isip donasyon niini nga magamit sa pagpahiluna sa mga komunidad sa mga mananagat.

Kini usab isip kabahin sa pasiunang pagpatuman sa ingon niining nasudnong proyekto sa China subay sa  mga nahisgutan dihang mitanda si Chinese Ambassador to the Philippines Huang Xilian niadtog buwan sa Agosto.

Niadtong miaging buwan, si Director Yang Weimin (Political Section) nanguna sa delegasyon sa Embahada uban ni Zhu Chenxian (Attaché, Political Section) ug Ms. Wang Xiameng (Attaché, Admin. Office) ming-anhi sa Bohol aron pagtunol sa gobernador sa donasyon, nga gisaksihan usab ni Acting Provincial Agriculturist Dr. Larry Pamugas, Provincial Treasurer Eustaquio Socorin ug Executive Assistant for Internal Relations Metodio "John" Maraguinot Jr.

Subay usab niini, nangayo karon og pagtugot si Gob. Aumentado sa SP nga pirmahan ang deed of donation paingon sa mga hingtungdang komunidad.

Ang P15 milyones, gamiton sa tulo ka komunidad aron sa pagpamalit og mga ekipos ug materyales alang sa paghimo og fish cage, mga kagamitan alang sa pagpanguma sa guso, pagpasanay sa lambay ug pagpalit og mga sakayan nga fiberglass lakip na ang  ipangsuhol sa mga trabahante alang niinng katuyuan.

Sa hangyo sa gobernador, gidasonan sa Sangguninag Panlalawigan pinaagi ni Bise Gobernador Victor Dionisio Balite ang panginahanglan sa pagtambayayongay sa tibuok kalibutanalang sa pagpadaghan sa pagkaon, panguma, pangisdaan ug  ang mga teknolohiya sa pagkaon samtang gidason usab sa junta ang iyang panaad sa pagtabang aron mo-ugmad ang value chain sa agrikultura.

Dugang sa SP nga ang Bohol padayon pang mangita og mga programa nga magseguro sa pagpadanan sa mga batakang serbisyo ngadto sa iyang mga katawhan.

Subay usab sa kasabutan sa Embahada sa PROC dinhi, ang Bohol maoy bahal nga magdumala sa  pundo pinaagi sa pagpamalit, pagpahiluna ug pagpadagan sa proyekto samtang sa lalawigan usab ang magtutok aron segurohon nga dekalidad ang materyales nga mapalit, ug mapatuman ang mga balaod alang niining pagpamalit.

Niini, gipaabut usab nga maghimo na ang SP sa tukmang mga lakang aron mapasugdan na ang paggamit sa  pundo nga donasyon. (RAHC/PIA7 Bohol)