SYUDAD SANG ROXAS, Capiz (PIA) -- Naglab-ot na sa 6,585 ka mga relief goods ang napanagtag sang lokal nga panguluhan sang probinsya sang Capiz pinaagi sa Task Force Pagdumdom sa mga lugar nga direkta nga naapektuhan sang makahililo nga red tide.

Ang nasambit nga bulig ang kabahin sang mga inisyatibo sang probinsya matapos nga gindeklara sang Bureau of Fisheries and Aquatic Resources (BFAR) nga positibo sa Paralytic Shellfish Poison (PSP) ukon makahililo nga red tide ang kalalawran sang Roxas City kag kabanwahanan sang Ivisan, Sapian, Panay, President Roxas kag Pilar.

Ginpahayag ni Atty. Luvim Amores nga Public Information Officer sang probinsya nga ang bulto sang relief goods nga napanagtag nga masobra sa lima ka libo ang gin-distribute sa nabilin nga inadlaw sang Disyembre tubtob sa antes ang bag-ong tuig.