TAGBILARAN CITY, Bohol, Jan. 19 (PIA) -- Karon nga rehistrado na ang imong Subscriber Information Module (SIM) Card, tambag sa mga opisyal sa  Department of Information and Communications Technology nga kinahanglan nga itaho dayun sa telecommunications company provider ang pagkawala ilabi na kon gikawat ang rehistradong SIM Card.    

Kini kay mahimong mogamit ang mga scammers sa mga kinawat ug preregistered nga SIM card sa paglimbong sa mga tiggamit sa telepono, ang DICT miingon adlaw’ng Huwebes.

Basi'g gamiton sa mga scammer ang ilang pagkatawo sa ilegal nga kalihokan, bahad sa DICT. 

Si DICT Undersecretary Anna Mae Lamentillo sa usa  ka pahayag niingon nga dili lang mga tigbaligya apan lakip na ang mga pumapalit sa mga kinawat ug preregistered nga SIM card ang manubag.

“May mga report po na nagbebenta ng stolen SIM cards or preregistered SIM cards. Sinasabi lang po namin na ito ay ipinagbabawal sa batas at hindi lang po yan multa, may kasama po yang kulong,” matud pa ni Lamentillo.

Sa pagpatuman sa mandatory registration sa SIM cards, gitumbok ni Lamentillo nga ang mga mangingilad mahimong mangitag laing paagi aron mapadayon ang mga scam.

Dugang pa niini nga nasayod kita nga gamiton ug pahimuslan sa mga scammers ang mga kinawat nga SIM card.

Dugang pa ni Lamentillo nga ang mga scammers mahimo usab nga mogamit sa "spoofing" diin mahimo silang magtakuban sa ilang kaugalingon nga adunay lahi nga display name sa mga mensahe.

Gawas niini, giingong adunay mga peke nga website nga nagpakaaron-ingnon nga kabahin sa proseso sa pagparehistro sa SIM. Tungod niini, iyang gitambagan ang mga subscriber nga adto lang magparehistro sa opisyal nga website sa ilang telco providers.

Gipasidan-an ni Lamentillo nga gukdon sa mga awtoridad ang mga mangingilad nga mogamit sa proseso sa pagparehistro sa SIM aron pildihon ang katuyoan sa balaod.

Sa pagkakaron, kapin sa 21.782 ka milyon sa 168.977 ka milyon nga subscribers sa tibuok nasod ang nakarehistro, pagbutyag ni Lamentillo. (ECB/PIA7 Bohol)