TAGBILARAN CITY, Bohol, Jan. 11 (PIA) -- Gimanduan ni Presidente Ferdinand R. Marcos Jr. ang Department of Justice (DOJ) niadtong Martes sa pagpadayon sa pagpagawas sa mga persons deprived of liberty (PDLs) nga kwalipikado sa parole aron ma-decongest ang mga pasilidad sa koreksyon sa nasud.

Atol sa usa ka Cabinet meeting sa Malacañang, si Presidente Marcos niingon nga base sa iyang kasinatian isip gobernador sa Ilocos Norte, kadaghanan sa mga PDL nagtingkagol sa prisohan tungod kay dili sila maka-afford sa serbisyo sa mga maayong abogado.

“Wala naman silang magaling na abogado. So that’s why we are in favor now to release many of them,” matud pa ni Marcos atol sa Cabinet meeting.

Dugang pa sa Pangulo nga nagkinahanglan lang ang mga PDLs og representasyon aron mapagawas sila.

Gipaluyohan usab sa Presidente ang plano sa DOJ nga ibalhin ang gahi nga mga kriminal ngadto sa usa ka Alcatraz-type nga prisohan, nga ihimulag sila gikan sa kinatibuk-ang populasyon aron mahunong ang ilang mga kriminal nga kalihokan tungod kay nakahimo pa sila sa pagdumala sa mga operasyon samtang anaa pa sa luyo sa mga bilangguan.

Gitumbok usab ni Presidente Marcos ang kaylap nga korapsyon sulod sa Bureau of Corrections (BuCor) samtang iyang gipasiugda ang panginahanglan sa pagbalhin sa mga piniriso ngadto sa mga espesyal nga pasilidad.

Sa 2022 accomplishment report niini, ang DOJ niingon nga nagpagawas kini og halos 3,000 ka PDL gikan sa Hulyo hangtod sa Disyembre 2022 isip usa ka dinaliang lakang sa pag-decongest sa correctional facilities.

Gipapaspas usab sa DOJ ang pagproseso sa pagpagawas sa mga kwalipikadong binilanggo pinaagi sa pag-digitize sa mga sistema sa Probation and Parole Administration.

Karong tuiga, ang departamento sa hustisya naglantaw sa pag-decongest sa mga pasilidad sa prisohan pinaagi sa pagbalhin sa maximum security compound sa syudad sa Muntinlupa ngadto sa gipahinungod nga correctional facility sa Sablayan, Occidental Mindoro.

Nagplano usab ang DOJ nga magtukod ug managlahing pasilidad sa krimen sa Luzon, Visayas, ug Mindanao. (ECB/PIA7 Bohol)