VALENCIA CITY, Bukidnon (PIA)--Siyam ka mga rehistradong 'peoples organization (POs') sa kanhi mga rebelde sa New Peoples Army nakadawat ug P900,000 gikan sa lokal nga kagamhanan sa Valencia City, Bukidnon, Enero 11.

Alayon kini sa pag-pursige ug kadasig sa mga kanhi rebelde aron mo-asenso ug mo-uswag ang ilang panginabuhi human sila mibiya sa Komunistang grupo.

Kada usa ka organisasyon gihatagan ug tag P100,000. Ang siyam ka asosasyon mao ang 1. Farmers Revival Association 2. Domago-ok Farmers Association 3. Samahan ng mga Balik-Loob Association 4. Pag-asa Womens Association Pig Dispersal 5. Barangay Mabuhay Farmers Association 6. Samahan ng mga Kababaihan ng Laligan  7. Bulacao Riders Organization 8. Laligan Curvada Spring Association, ug 9. Laligan Farmers Association.

Sumala ni Legal Officer Atty. Marlowe Selecios, giseguro ni Valencia City Mayor Azucena Huervas nga gahinan sa pundo ang siyam ka asosasyon aron magsilbing ‘start-up capital’ sa mga kanhi rebelde nga mibalik sa gobyerno.

Miingon si Selecios nga nagla-um ang gobyerno, partikular ang Valencia local government unit ug ang mayor, nga magamit sa sakto ang tabang pinansyal ug maayo ang pagdumala nila sa asosasyon aron sa sunod nga tuig dunay dugang financial assistance nga ihatag.

Nagpasalamat si Marestela Bitago, usa sa mga kanhi rebelde, nga nakadawat og tabang gikan sa gobyerno. Tungod niini, iyang gidasig ang mga kanhi kauban sa kalihukan nga mobalik na sa gobyerno aron manginabuhi nga walay gikahadlokan ug magpuyo nga malinawon. (BGE/PIA-10/Bukidnon)