TAGBILARAN CITY, Bohol, Jan. 23 (PIA) -- Gi-awhag sa Commission on Elections (COMELEC) ang mga eligible Filipino voters nga magparehistro sa dili pa ang deadline sa Enero 31, 2023.

Kini tungod kay posibleng dili na i-uswag pa ang voters registration alang sa 2023 Barangay ug Sangguniang Kabataan Elections (BSKE).

Sa usa  ka pahayag, miingon si Comelec Chairman George Garcia nga walay igong rason ang poll body aron i-uswag ang registration tungod kay gipahibalo na nila sa publiko ang mga impormasyon.

Apil na usab ang paglusad sa Register Anywhere Project (RAP) diin gitugotan ang mga kwalipikadong botante nga magparehistro sa mga booth sa ilang establisyimento sama sa mga malls.

Apan gitumbok ni Garcia nga posibleng ikonsidera sa ahensya ang extension sa ilang lugar nga gibaha tungod sa dautang panahon.

Sa datos sa Comelec, naa sa 1,028 ,000 aplikante na ang nadawat nila sukad niadtong Disyembre 12, 2022, diin target nila nga magbaton og 1.5 hangtod 2 milyon nga bag-ong registered voters hangtod sa deadline niini.

Kahinumdoman nga gibalik sa Comelec ang voters’ registration alang sa local ug overseas voters niadtong Disyembre 12, 2022.

Alang sa local voter registration, ang mga kwalipikadong botante mahimong moduso sa ilang documentary requirements ug magpakuha og biometrics data sa Office of the Election Officer (OEO) o bisan asang satellite registration site nga adunay hurisdiksyon sa ilang residente.

Gawas sa filled-out form, ang mga aplikante angay usab magpakita ug moduso og proof of identity nga gitugot sa Comelec o sa gipanumpaang affidavit of identification.

Mahimong moadto ang mga magparehistro sa buhatan sa election officer o satellite registration sites sa ilang lugar gikan Lunes hangtod Sabado, apil ang holidays, matag alas-8 sa buntag hangtod alas-5 sa hapon. (ECB/PIA7 Bohol)