LUNGSOD NG SORSOGON, Sorsogon (PIA) - Iginawad sa pamahalaan bayan ng Bulan at Barcelona sa lalawigan ng Sorsogon ang Green Achiever Award ng Department of Health-Bicol Center for Health Development sa “Salud Bicolnon” awarding ceremony na ginanap sa Legazpi City nitong ika-13 ng Enero, Biyernes.

Ang local government units (LGUs) ng Barcelona at Bulan ang dalawa sa apat na LGUs sa Bicol na nakatanggap ng prestihiyosong parangal.

Ang green achiever award ay ipinagkakaloob sa LGUs na may natatanging husay sa pagbibigay ng mga serbisyo at pangangalagang pangkalusugan sa kanilang mga nasasakupan.

Sumailalim sa pagtasa ng Department of Health ang performance ng LGUs gamit ang scorecard ng specific health indicators.

Ang LGUs na nakakuha ng pinakamaraming bilang ng green marks sa scorecard ang makakatanggap ng Green Achiever Award.
Pinakamataas itong pagkilala na ibinigay ng DOH sa ilalim ng Salud Bicolnon Awards.  (PIA5/Sorsogon)