TUGUEGARAO CITY, Cagayan (PIA) - - Puspusan ang isinasagawang pagbabakuna ng Department of Agriculture (DA) region 2 sa mga kalabaw at baka laban sa anthrax sa lalawigan ng Cagayan.
Pinangunahan ng DA 2 - Animal Health and Welfare Unit Regulatory Division, kasama ang lokal na pamahalaan, ang malawakang pagbabakuna sa mga alagang kalabaw at baka ng mga magsasaka sa Brgy. Callasitan, Sto. Niño, Cagayan.
Ayon sa mga opisyal ng DA, kailangang mabakunahan ang mga alagang kalabaw at baka ng mga magsasaka upang pigilan ang pagkalat ng naturang sakit at upang hindi na ito maihawa sa mga tao.
Nagsagawa rin ng pagbabakuna sa bayan ng Solana kung saan umabot sa isang daan at dalawampu't walo ang kabuuang naserbisyuhan.
Hinikayat ni Regional Executive Director Narciso Edillo ang mga magsasaka na ipabakuna ang kanilang mga alagang kalabaw at baka upang mapigilan ang pagdami ng mga maapektuhan ng nasabing sakit.
Ipagpapatuloy din ang pagbabakuna sa iba pang mga bayan na una nang nagkaroon ng kaso ng anthrax.
Ang pagbabakuna ay solusyon laban sa pagkalat ng bacteria na sanhi ng Anthrax. (OTB/PIA Region 2 with reports from Jonalyn Juan/Ferdinand Cortez-DA)
