TUGUEGARAO CITY, Cagayan (PIA) - - Bagu nagangwa i Bureau of Internal Revenue - Region 2 ta Tax Compliance Verification Drive (TCVD) ta tyenda ira nga mallaku ta sigarilyu anna binarayang ta siyudad na Tuguegarao. 

Turi nga operasyon, nga vinulun na pulis ira, kinonfiska na totolay na BIR y ngamin nga melaku nga sigarilyu anna binarayang ira nga awan tu internal revenue stamp na, megafu ta danaw ay makagi nga illegal. Meyammung ta nagafu  nga produkto ira ay yuri falso y selyo da.

I kebalinan na yaw ay nelilli ta pappaga ta excise tax yuri mallaku ira nga nagafu’ megafu ta i sigarilyu anna binarayang ira ay nepatallugaring nga mepangngo nga mapagan ta excise tax nga makagi. 

Segun ta Section 258 na Tax Code, y multa para ta ilegal nga panga onu pattuttul ta produkto ira nga mepangngo ta excise tax ngem ari tu nappaga, ay ari maggugak ta 30,000 pesos. Meyammung taw, yuri nakaliwa ira ay uyya nga mekkarsel ta adde ta appa nga ragun.

Doban gapa na BIR danuri estabilisimyento ira nga nagafu’, nga tumuttul ta proseso na appaga ta gatu da ta gobyerno, lige da mapanagarulian.

Yuri TCVD nga nakwa ta Tuguegarao ay negiddan ta ollo-ollu nga nationwide verification drive nga ne-organisa na BIR ta interu Filipinas. 

Segun kani BIR-2 Assistant Regional Director Mashrollah Conding, mannanayun lagapa noka i kukukwan na ahensya nga TCVD ta Rehiyon Dos. Nekagi na nga dakal i uffun na gumatang ira nu idanuk da yuri mallaku ira ta illegal nga produkto kagitta na sigarilyu anna binarayang. (OTB/JKC/PIA Region 2)