TAGBILARAN CITY, Bohol, Jan. 25 (PIA) -- Mikabat na sa 57% sa mga kabaranggayan sa Bohol nga kanhi gisamok sa illegal nga drugas ug ang patigayon niini ang gikataho nga napalingkawas na sa hulga.
Kini nakasandig sa taho sa Bohol Provincial Police Office atul sa minglabay nga tigun sa Provincial Peace and Order Council didto sa ceremonial hall sa bag-o nga Kapitolyo sa Bohol niadtong minglabay nga semana.
Sa, 1,109 ka mga barangay sa Bohol diin napulo ug pito lamang niini ang wala gayud maapektohi sa suliran nga nakapahungog sa mga kabataan ug bisan na gani sa mga hamtong, ming-abut usab sa dul-an sa 40 mil ka Bol-anon ang boluntaryo nga mingtahan sa ilang kaugalingon diha nga gipatuman ang nasudnong kampanya sa kapolisan nga Toktok-Hangyo kaniadto.
Sa labing bag-o nga kasayuran, nabutyag sa gipaambit ni Police Lieutenant Colonel Joseph Berondo nga hangtud sa Disyembre 17, nadeklara na nga luwas sa hulga ang 212 ka mga barangay nga gikataho nga may medyo grabe nga hulga sa illegal nga drugas.
Lain usab nga 398 ka mga barangay nga may nataho nga dyutay nga hulga sa drugas ug illegal nga patigayun niini ang nakagawas na sa lit-ag nga kasagaran makapuo sa mga maayong ugma sa kabataan didto.
Niini, kinatibuk-an nga 610 ka barangay ug pun-an sa 17 nga wala gyud mahulga, moabut na sa 627 ka barangay ang nakalingkawas na sa kadaut.
Sa laing bahin, nakatutok karon ang mga tinugyanan sa Provincial Team sa nahibilin nga 272 ka barangay nga may mas grabe pa nga suliran ug lain pa gyud nga 210 nga medyo may nataho nga mga suliran sa illegal nga drugas.
Ug dala sa 610 ka mga barangay nga nakalingkawas na sa hulga sa illegal nga drugas, 482 na lang usab ka barangay ang karon kasamtangan nga gi-abagan sa mga tinugyanan sa Philippine Drug Enforcement Agency, Department of Interior and Local Government ug Department of Health alang sa ilang pagpatuman sa mga programa nga nakaganoy sa ilang mga katawhan nga magpahilayo sa drugas.
Niini, kon matibawas, mawala na unya ang hulga sa drugas sa Bohol, panahum sa mga sakop sa PPOC. (RAHC/PIA7 Bohol)
