DAVAO CITY (PIA) – Ilunsad sa Land Transportation Franchising and Regulatory Board - Region XI (LTFRB XI) ubos sa Public Utility Vehicle Modernization Program (PUVMP) ang walo sa 15 ka Class 3 Modernized UVE gikan sa Kapatagan Transport Cooperative (KATCO) sa Brgy. Kapatagan, Digos City.

Matud pa ni Dir. Lllanos kining mga modernized unit magaserbisyo sa ruta nga Aplaya, Digos City padulong Poblacion, Bansalan via Kapatagan.

Mahinumduman nga atol sa naaprubahan nga Local Public Transport Route Plan (LPTRP) gikan sa Provincial Government of Davao del Sur, usa ka ordinansa ang naaprubahan sa Sangguniang Panglungsod ng Davao del Sur – ang Local Sanggunian Ordinance No. 21-105 kaniadtong Oktubre 4, 2021. Kini nga ordinansa ang gibasehan sa pagmugna sa LTFRB Memorandum Circular (MC) No. 2022-019. Kini nga MC ang nag-abri sa mga aplikasyon gikan sa mga kooperatiba nga mopadagan sa ruta. Ang KATCO naaprubahan sa ilahang aplikasyon kaniadtong Abril 25, 2022.

Ang maong paglunsad panguluhan ni LTFRB XI Regional Director Don Llanos III, LTFRB XI PUVMP Head Engr. Ronnel Victor Panigon, mga miyembro sa KATCO, kauban ang pipila ka mga opisyales sa Province of Davao del Sur LGU, Digos City LGU, ug Brgy. Kapatagan.

Ang KATCO malipayong maglunsad sa mga modernized vehicle isip pinakaunang ruta sa kooperatiba nga napailaluman sa LPTRP ug PUVMP. Mapasalamaton ang mga miyembro nga masugdan ang panginabuhian sa suporta sa gobyerno pinaagi sa sabsidiya gikan sa Modernization Program.

Ang KATCO, ika-3 na nga kooperatiba sa Davao Region nga naka-launch og modernized vehicles nga adunay assistance gikan sa Development Bank of the Philippines (DBP) ug Land Bank of the Philippines (LBP).

Ang PUVMP naghinaot nga makahatag sa katawhan og komportable, masaligan, luwas ug environment friendly nga transportasyon alang sa kadaghanan, samtang maghatag og malungtarong panginabuhian sa mga kooperatiba. (PIA/ETIsidro with report from LTFRB)