SIQUIJOR, Siquijor, Feb. 2 (PIA) -- Maayong balita na usab alang sa mga mga Siquijodnong mag-uuma ug mangilisdaay tungod kay aduna na’y Province-led Agriculture and Fisheries Extension Center o PAFEC nga ilang kadangpan aron mas magmabungahon ug malamboon ang ilang panginabuhian.
Gitagana nga ang mga programang pang agrikultura moagi sa maong buhatan.
Ang PAFEC gi bendisyunan kaniadtong Enero 19 ug gitukod alang sa Province-led Agriculture and Fisheries Extension System kon PAFES nga gilusad sa Department of Agriculture (DA) sa susamang adlaw uban ang Agricultural Training Institute, Bureau of Fisheries and Aquatic Resources ug mga opisyales sa probinsyal nga kagamhanan sa Siquijor.
Mga opisyales sa buhatan sa agrikultura ug sa lokal nga kagamhanan atol sa paglusad sa Province-led Agriculture and Fisheries Extension System sa Dugokanan sa Kapitolyo, Siquijor, Siquijor. (PIA Siquijor/Niña Rhose Ocso)
Ang PAFES usa sa tulo ka mga stratehiya sa DA nga maoy magpalig-on sa pakiglambigit niini ngadto sa mga Local Government Units (LGUs), pribadong sektor, mag-uuma ug mangilisdaay ug uban pang mga ahensyang nasyunal sa gobyerno aron sa pagpa asenso sa agrikultural nga industriya ug mahatagag saktong pagtagad ang food security sa isla.
Pinaagi sa PAFES, madugangan pa ang kaalam sa mga mag-uuma ug mangilisdaay, mapalig-on ang koneksyon sa mga kalambigit niini, ma imprub ug mapaligdong ang panukiduki, mo taas ang abot, mo asenso ang panginabuhi ug magmalahutayon ug magmalampuson ang isla sa gi mithing ekonomikanhong kalamboan sa agrikultural nga industriya. (RAC/PIA7 Siquijor gikan sa taho ni Niña Rhose Ocso)
Paglusad sa PAFES didto sa Dugokanan sa Kapitolyo nga gitambungan sa nagkalain-laing hugpong sa pang-agrikultura ug mga buhatan nga nalambigit sa maong programa. (PIA Siquijor/Niña Rhose Ocso)
