TUGUEGARAO CITY, Cagayan (PIA) - - Megafu ta maddaggun paga laman y pappataddak ta kongkreto nga talletay ta Amulung, Cagayan ay nangipataddak labbi ta steel bridge onu talletay nga balayang y guviernu nga mangituvvug ta Amulung East anna Amulung West. 

Y proyekto ay ne-ollu na ofisina ni 3rd district Representative Joseph Jojo Lara nga yayya gapa y nangiyalek ta fondo na maddaggun nga mepataddak nga Amulung Bridge. 

Inagolluan ni 3rd district Representative Joseph 'Jojo' Lara y nekevuka na steel bridge sangaw nga aggaw, kavulu na y ofisyales ira na LGU Amulung.

Kinagi na nga tempuraryu laman y talletay para ta totolay ira anna takay nga medyu nalappaw laman, tape ari ngana mangi-usa ta barangay y totolay ira anna ari ngana malelevu ta arayyu y takay ira. 

Ta maddagun, ay barangay y usan na totolay ira nga maddaki nu umay ira ta maddammang nga lugar. Y Amulung Bridge ay nagaddwa megafu ta Cagayan River. 

Daka-dakal gapa y appabalo na taga Amulung ira kanni Honorable Lara ta pangipataddak na nakagi nga talletay. 

Kinagi ni Mayor Elpidio Rendon nga kuruga dakal y me-uffun na nakagi nga steel bridge, miski tempuraryu laman, dyebi ta istudyante ira nga maggubbo ta tangabbagan nga lugar anna ta minakkusetsya ira ta angngidaki ra ta afektos ra ira anna ta api ra.  (JKC/OTB/PIA Region 2)