KAUSWAGAN, Lanao del Norte (PIA)--Gipaspasan na sa local government unit (LGU) dinhi  ang pagtukod sa international convention center kung diin buhaton ang  6th Organic Asia Congress.

Nahimutang ang center sa 5 ka ektarya nga yuta sa Brgy. Tacub nga gipanag-iya sa LGU. Itukod dinhi ang duha ka clamshell-type nga mga venue, usa ka prefabricated nga kusina nga adunay cafeteria, usa ka business center  nga adunay admin building ug akomodasyon- teepee-type nga dormitoryo ( coconut hub area), ug usa ka façade.

Sumala ni Mayor Rommel Arnado, hagit kanila  ang pag-ulan. Hinuon, matod niya masaligon sila nga mahuman nila ang venue sa tunga-tunga sa Mayo. Paambit niya nga gibutangan og solar lamps ang lugar aron makatrabaho ang mga construction worker bisan gabii.

Matud usab sa mayor nga ang maong center mamahimong income generating facility sa munisipyo.

"Looking beyond, there will be a lot of money that will be generated. It's a beautiful convention; it can accommodate thousands of people, even concerts. We will have that facility in northern Mindanao," sumala niya.

Ang 6th OAC usa ka prominenteng internasyonal nga kalihokan sa tibuok kalibutan bahin sa organikong agrikultura. Magpakita usab kini og lima ka lain-laing dagkong mga panghitabo. Kini mao ang 6th Organic Asia Congress, Organic Youth Forum,  9th Asian Local Government for Organic Agriculture Summit,  4th Global Alliance of Organic Districts, ug Women in Organic Agriculture in Asia. (LELA/PIA-10/Lanao del Norte)