KALIBO Aklan (PIA) --  Sertipikado eon makaron nga Learning Site for Agriculture (LSA) ro Aklan Agri-Aqua Demonstration Farm and Training Center (AAADFTC) paagi sa  Department of Agriculture-Agricultural Training Institute (DA-ATI).

 Rayang demo farm hay makit-an sa Barangay Nalook, Kalibo, Aklan.

Suno sa Office of the Provincial Agriculturist (OPA) – Aklan, ro pagtao it Certificate of Accreditation hay ginhiwat sa ATI Training Hall sa Banga, Aklan ku pagselebrar kurundaya eamang it ana ku DA-ATI nga ika 36 nga anibersaryo.

Magaserbe man ra nga "farm tourism site" sa mga mangunguma, mga miyembro sa komunidad, mga partisipante it DA sa paghanas, mga estudyante sa pagpangisda ag agrikultura, ag iba pang mga pribadong pumueuyo.

May kapasidad man ra nga magbaton it "work immersions" para sa mga estudyante sa senior high school ag sa tertiary ag pagahalinan it iba pang serbisyo sa agri-business, suporta sa impormasyon, ag "technology demonstration."

Samtang, ro demo farm hay naga produser eon ag nagabaligya it semilya it tilapia makaron paagi kara sa ana nga Aklan Provincial Freshwater Tilapia Hatchery.

Kurundaya eamang, ro gobyerno lokal it Buruanga, Aklan hay nakabakae it 20,000 nga semilya it tilapia agud hipabaskog pa gid ro naga inabu nanda nga mga nagapaeagku it tilapia.

Ro demo farm hay gina operar it gobyerno probinsyal it Aklan sa tuyo kara nga maabot ro ginapanan-aw nga “Pagkaing Sapat Para Sa Lahat, Aklan Aangat!" (JBG/VGV/PIA6 Aklan)