TUGUEGARAO CITY, Cagayan (PIA) - - Nakisarita ti 77th Infantry Battalion iti LGU Baggao mainaig iti nadadael a mula a mais dagiti umili a naapektaran iti itay nabiit a panagsasabet dagiti tropa ti gobierno ken rebelde a grupo sadiay Sta. Margarita, Baggao.

Inreport ti militar ti insidente iti Municipal Agriculture Office babaen ken ni Giner Manding ti nagbanagan na.

Nakisarita pay kadagiti mannalon a nadadael ti apit da gapu iti posible a tulong ti gobierno, pakairamanan ti gobierno iti probinsiya.

Malaksid iti daytoy, kontakin met lang ti Municipal Agriculture Office (MAO) iti Department of Agriculture tapno dumawat iti tulong.

Naituding a mangitulod ti opisina ti MAO iti bukel ti nateng kadagiti apektado a mannalon iti Barangay Sta. Margarita.

Ur-urayen pay laeng ti MAO ti sungbat manipud iti Department of Agriculture Regional Office 2 para iti kiniddawda a Corn Seeds, Rice Seeds ken Livestocks a mabalinda nga iwaras kadagiti naapektaran iti pannakadadael ti apit.

Malagip a nagdisso ti helicopter ti Philippine Army kadagiti talon ti mais iti lugar a nakapasamakan ti rinnupak gapu iti pannakadadaelda. (MDCT/PIA Cagayan)