TAGBILARAN CITY, Bohol, Feb. 15 (PIA) -- Usa ka agricultural trading facility nga nagkantidad og P14-milyon sa dili madugay ang mobarug sa Barangay San Jose, lungsod sa Talibon, human sa gipahigayong groundbreaking ceremony niadtong Pebrero 10, 2023.
Ang groundbreaking ug pagbutang sa kapsula magsugod sa pagtukod sa pasilidad sa trading post, diin direktang makabenepisyo ang mga mag-uuma ug mangingisda ingon man ang mga lokalidad.
Ang pasilidad nga nagkantidad og P 14-milyon gipundohan sa Department of Agriculture (DA) ug sa LGU-Talibon, diin ang P 4-milyon isip LGU-equity, samtang ang P 10-milyon isip project grant gikan sa dugang alokasyon sa pondo sa DA-Central Visayas pinaagi sa paningkamot ni Gobernador Erico Aristotle Aumentado, kinsa kanhi Congressional District Representative sa lalawigan sa Bohol.
Si Talibon Mayor Janette Garcia niingon nga ang trading facility dako og ikatabang sa pagpamaligya sa mga produkto sa agri-fishery sa mga mag-uuma ug mangingisda. Ang lungsod sa Talibon, matud niya bulahan nga adunay abunda nga kahinguhaan sa agrikultura ug pangisda.
Si Petronila Corpuz, DA-7 Agribusiness and Marketing Assistance Division (AMAD) Chief nagkanayon nga ang pasilidad mosuporta sa mga mag-uuma ug mangingisda sa pagbaligya sa ilang mga produkto.
Ang pag-display sa ilang mga palaliton niining itukod nga pasilidad makahatag kanila og mas maayong kita tungod kay direkta silang ibaligya ngadto sa mga pumapalit ug mga konsumidor.
Ang pasilidad, matud niya, makabenepisyo sa mga 9,000 ka rehistradong Registry System for Basic Sector in Agriculture (RSBSA) nga mga mag-uuma gikan sa kabukiran ug mga mangingisda gikan sa kabaybayonan ug isla, lakip ang 210 ka farmers cooperative and associations (FCA) sa Talibon ug kasikbit nga mga lungsod.
Mitambong usab sa groundbreaking sila si Bise Gobernador Dionisio Victor Balite, Bise Mayor Dave Evangelista, AMAD Assistant Chief sa DA7 Lorelie Acha ug Agricultural Program Coordinating Officer Roman Dabalos, mga sakop sa Sangguniang Bayan, department heads ug pipila ka mga piniling opisyal. (ECB/PIA7 Bohol)
