KALIBO, Aklan (PIA) --  Ginpamunuan kurundaya eamang ni Secretary Conrado Estrella III it Department of Agrarian Reform  ro pagpanupod it Certificate of Land Ownership Awards (CLOAs) ag mga makinarya sa pagpanguma sa mga mangunguma ag mga Agrarian Reform Beneficiary Organizations (ARBOs) sa Aklan.

Sa ginpatigayon nga sangka turnover ceremony sa Barangay Naisud Covered Court sa banwa it Ibajay sa Aklan, 183 nga mga CLOA ro anang ginpanupod sa 175 nga mga Agrarian Reform Beneficiaries (ARBs)  nga halin sa an-um nga mga banwa – tatlo halin sa Primerong Distrito nga Altavas, Libacao ag Madalag, ag tatlo man halin sa Segundo Distrito nga Ibajay, Malay ag Buruanga.

Ro kabilugan nga kaeaparon it eugta nga ginpanao paagi sa mga CLOA hay 304.9715 nga ektaryas, kon siin ro Madalag ro may pinamaeapad nga may 111.3117 ektaryas ag ginsundan it Libacao  nga may 103.7477; Buruanga, 38.8341; Malay, 27.4701; Ibajay, 15.5563; ag Altavas nga may 8.0524 ektaryas.

Sa pihak nga parte, ro daywang ka ARBOs nga Aglucay Farmers Multi-Purpose Cooperative  it Aglucay, Makato, Aklan, ag Rosario Multi-Purpose Cooperative it Rosario, Malinao, Aklan ro nagbaton it mga makinaryang pangpanguma nga ginpanupod ni Sec. Estrella.

Palmares, mga opisyales it Aklan sa pagpamuno ni Governor Jose Enrique Miraflores, Mayor Jose Miguel Miraflores it Ibajay, Representante Teodorico Haresco it Segundo Distrito it Aklan, ag Iloilo 5th Representative Ferjenil Biron hay nagdiretso sa Ea-aw Naisud para sa pagbendisyon, Ribbon-Cutting ag Turnover Ceremony it Tulay ng Pangulo, sangka tulay nga maga konektar sa ap-at nga barangay sa Ibajay agud mapaeumo ro pagdaea it mga mangunguma ku andang mga produkto sa mga baealigyaan.

Ro Tulay ng Pangulo hay una eamang sa likod it Naisud Covered Court ngani gintikang lang it grup ro lugar para sa pagpanupod it mga CLOA ag mga makinarya nga nagserbe nga pagsara sa pagbisita sa Aklan ni Secretary Estrella. (JBG/VGV/PIA6 Aklan)