MARAWI CITY, Lanao del Sur (PIA)--Pagkahuman sa duha ka tuig nga paghunong tungod sa pandemya sa COVID-19, ang Kariyala Festival sa lungsod sa Wao nibalik na sa "limelight" karong tuiga.

Gipasiugda sa lokal nga kapistahan ang ika-62 nga foundation day sa lungsod nga gisaulog gikan Pebrero 14 hangtod Pebrero 22 nga dunay tema nga “Soaring High Towards Excellence and Global Competitiveness to the New Normal.”

Ang Kariyala kay Maranao nga termino para sa paglipaylipay ug pagpasalamat sa kalinaw ug abunda nga ani. Ang pista nagsentro usab sa panaghiusa sa tulo ka dagkong kultural nga komunidad sa munisipyo ug pagpasalamat sa abunda nga ani ug kalinaw.

Si Wao Mayor Elvino Balicao Jr. miingon nga ang selebrasyon maoy ilang paagi sa pagpakita nga ang lain-laing kultural nga komunidad sa Wao nagkahiusa.

"That is why Wao also means 'we are one.' Mapa-Muslim man, Kristiyano o nitibo, dito sa Wao ay pantay-pantay lahat," matud pa niya.

[Mao nga ang Wao nagpasabut usab nga 'We Are One.' Mapa-Muslim man, Kristiyano o nitibo, dinhi sa Wao kay managsama ang tanan.]

Samtang, usa ka civic parade nga puno sa madasigon nga mga kolor ug mamugnaong ritmo ang gihimo atol sa anniversary program niadtong Pebrero 21. Ang mga tambol ug mga kampana gipalanog samtang ang mga opisyal ug empleyado sa lokal nga gobyerno, mga estudyante, mga opisyal sa barangay, mga ahensya, ug mga sektoral nga organisasyon nagmartsa paingon sa town plaza aron moapil sa programa.

Usa ka kompetisyon kon drum and bell competition nga gisalmotan sa elementarya ug sekondarya ang gipahigayon sa samang adlaw nga gisundan sa usa ka Reggae Night concert ug fireworks display.

Sa wala pa ang programa sa anibersaryo, lain-laing mga kalihokan usab ang gihimo aron sa pagpanindot sa selebrasyon karong tuiga. Lakip niini ang agro-trade expo, motocross, biking, Kalilang, ug ang ‘Search for Mutya ng Wao 2023.’

Ang labing gipaabot nga Kariyala Street Dancing and Showdown nahimong sentro niadtong Pebrero 22 nga nagdala sa tema nga “Sayaw Pasasalamat Sa Biyayang Ani at Kapayapaan.”

Ang mayor nagpasalamat sa katawhan sa lungsod ug sa tanang barangay local government units sa ilang pagtampo sa kalampusan sa ilang nakalinya nga mga aktibidad.

Gipahinumdoman usab niya sila nga magpabiling mabinantayon batok sa mga makadaut sa kalinaw ug gidasig sila nga padayon nga magtinabangay alang sa usa ka mas lig-on nga lungsod. (APB/PIA-10/Lanao del Sur)