SYUDAD SANG ROXAS, Capiz (PIA) -- Ginapanawagan ni Engr. Leah Doromal nga OIC regional director sang National Telecommunications Commission (NTC) Regional Office 6 ang mga Capiznon nga magpa-rehistro na sang ila Subscriber Identity Module (SIM) card sa mas temprano ukon antes pa ang Abril 26 nga deadline.

Ginpahayag ni Doromal nga ang pag-rehistro sang SIM card ang sarang paagi sa Facilitated ukon Assisted SIM Registration kag sa online nga proseso.

Ang Facilitated SIM Registration (FSR) ang ginapatigayon sa pagpanguna sang NTC sa bulig sang mga Public Telecommunication Entities ukon telco kag natungdan nga mga lokal nga gobyerno agud nga mabuligan ang mga target nga kliyente kapareho sang mga katigulangan, mga may sablag sa lawas kag may problema sa koneksyon sa internet subongman may problema sa kapabilidad sang ila cellphone agud nga mapatigayon ang proseso sang pag-rehistro.

Samtang, ang mga telco ang may mga outlet man para sa ginapatigayon nga Assisted SIM Registration agud mangin mahapos kag labi nga mabuligan ang ila mga subscriber.

Ang mga tag-iya sang SIM card ang mahimo man nga makarehistro sa mas popular kag ginagamit nga proseso sang kadam-an sang mga nakarehistro na nga amo ang "online" ukon pinaagi sa pagkadto sa website ukon application sang telco network. (JBG/AAL/PIA Capiz)