TAGBILARAN CITY, Bohol, March 5 (PIA) -- Pahimuslan ang kinaiya sa mga divers nga mogahin og tag duha ngadto sa tulo ka semana sa usa ka lugar aron masuhid sa mga nindot nga dive sites niini.
Kini maoy usa sa mga giya sa ipahigayon nga Bohol Dive Loop Expo 2023 (BholDEX 2023) nga mahitabo sa Abril 13-30, dinhi sa Bohol.
Matud ni Edgar, Vice President sa Panglao Association of Dive Operators (PADO) nga maoy kapartner sa Bohol sa pagpahigayon sa dive safari dinhi, sayang lamang nga sa tag-as nga pagpuyo sa mga divers sa Panglao, dali ra niini nga hugton ang pagsubay sa mga dive sites nga ikatanyag ang Panglao, Balicasag ug Pamilacan.
Limitado ang offer sa Balicasag kay aduna lang kini 5 ka core dive sites samtang ang Pamilacan adunay 2 ka dive sites ug ang Panglao, may pipila usab.
Apan kini, mahimo ra nga suhiron sa mga divers sa tulo ka adlaw, unya, kay wala na may ikatanyag pa, mohawa na sa Bohol ug muadto sa ubang lugar.
"Kwarta na unta sa ilang pagpundo sa Bohol apan kay kuwang sa dive sites, nakuha na hinuon sa ubang lugar," mulo ni Baylon.
Busa, pasabut niya, ilang gisabut ang mga kalungsuran nga maghimo ang PADO og dive assessment aron sutaon kon ikapanghaylo ba usab ang mga dive sites nga ilang nakita sa mga kalungsuran.
Gawas pa sa kakuwang sa bag-ong produkto sa dives, nakita usab sa PADO ang pagdagsang sa mga divers nga nahaylo sa ka ilado sa Bohol, ug nahadlok sila nga dili na makaya pa sa mga dive sites sa Panglao ang kadaghanon sa mga moadto didto.
Naapsan na ang Bohol sa pagdevelop og bag-ong mga sites sa kadaghan sa divers nga mingpilopilo ang kadaghanon sa katapusang mga katuigan, angkon ni Baylon.
Gawas sa gibantug nga kaanindot sa Panglao, may nakit-an na usab nga mga lugar sa Bohol nga may susama og aghat sa Panglao ug Balicasag, kini karon maoy tumong sa BoholDEX.
Sa BoholDex, ming-laum ang mga tigpasiugda nga gawas nga makasapi ang mga kalungsuran sa ilang pagpadumala sa ilang dive spots, may mga bag-ong lugar na usab nga mahimong kahatdan sa mga dive shops sa Panglao sa mga turistang divers nga motapnas sa Bohol. (JS/PIA7 Bohol)
