TAGBILARAN CITY, Bohol, March 15 (PIA) -- Gilugwayan ang bakasyon karong umaabot Semana Santa human gi-deklarar sa Malakanyang nga holiday ang Abril 10, Lunes.
Sa Proclamation No. 90 ni Presidente Ferdinand R. Marcos Jr., gibalhin ang pag-obserbar sa Araw ng Kagitingan ngadto sa Abril 10 gikan sa Abril 9, nga natunong sa Easter Sunday.
“To enable our countrymen to avail of the benefits of a longer weekend, Monday, 10 April 2023, in lieu of Sunday, 9 April 2023, may be declared as a non-working holiday, provided that the historical significance of Araw ng Kagitingan is maintained,” matud pa sa proklamasyon nga may petsang Nobyembre 22, 2022.
Ang Huwebes Santo (Abril 6) ug Biyernes Santo (Abril 7) maoy regular nga holidays sa nasod.
Gihimo ang maong lakang sa Malakanyang aron mahatagan og mas taas nga bakasyon ang katawhan dungan sa pagtimaan sa Semana Santa.
Una nang gipasabot sa Presidente nga adunay panginahanglan nga i-adjust ang mga holidays subay sa prinsipyo sa holiday economics diin ang mas taas nga semana makatabang sa pagdasig sa domestic nga pagbyahe ug pagdugang sa paggasto sa turismo sa nasud. (ECB/PIA7 Bohol)
