Ang BBMP sangka bahol nga programa kang DICT nga tuyo magtukod kang kapin 150 ka “Free WIFI for All” sites sa Antique para matugruan kang internet connection ang mga marayo nga lugar, pati man ang mga komunidad kang Indigenous Peoples (IP).

Sa ana nga mensahe, ginhambal ni DICT Sec. Uy nga ang dya nga programa napaidalom sa “Build Better More” nga inisyatibo ni Presidente Ferdinand Marcos, Jr.

Ginpasalamatan man kang opisyal si Sen. Legarda para sa ana suporta sa sektor kang Information and Communications Technology (ICT) kag sa ana bulig nga mapasanyog ang digitalization, ukon ang paggamit kang mga kompyuter kag internet, sa paglab-ot kang kauswagan sa pungsod.

Dugang pa ni Sen. Legarda nga prayoridad nanda ni Antique Lone District Representative Antonio Legarda, Jr. sa Kongreso ang digital inclusion.

Samtang, bahol ang pagpasalamat nanday Cong. Legarda kag Antique Governor Rhodora Cadiao sa DICT kag kay Sen. Legarda para sa dya nga programa nga magatugro kang internet connection sa marayo nga mga lugar kag sa tanan nga mga campus kang UA.

Nagperma man sa sangka Memorandum of Understanding (MOU) sanday DICT Sec. Uy, Sen. Legarda kag mga mayor kang nagkalain-lain nga banwa sa probinsya para sa implementasyon kang “e-Governance” nga tuyo maggamit kang teknolohiya sa pag-improbar kag pagseguro kang tampad nga serbisyo publiko. (AAL/BPS/PIA Antique)