TAGBILARAN CITY, Bohol, March 17 (PIA) -- Mingtanyag og bansaybansay alang sa katakus nga kinahanglan sa pagpanarbaho sa construction, tourism, wellness, ug maritime industries ang kompanya nga karon naghimo og shipyard sa Buenavista.

Apang sanglit kinahanglan kini nga mailhan pa sa tibuok Bohol, nagpaabut pa kini nga makalagda sa kasabutan alang sa mas malungtarong serbisyo sa pagpanghatag katakus nga makatrabaho ang katawhan.

Gawas pa, ang mga programa sa bansay niini, padayon pang giproseso ngadto sa Technical Education and Skills Development Authority (TESDA) mao nga wala pay scholarship niini nga pundo gikan sa goberno.

Gani, bisan sa kamaayo sa tanyag sa kompanya, buot pa sa Bohol, bisan pa kon kalagdaan sa Bohol ang partnership tali sa mga maghatag sa bansay, nga magduso pa kini sa mga rekisitos ngadto sa TESDA aron marehistro naang ilang mga bansay sama sa reinforcing Steel Works NC II; tile Setting NC II;, Plumbing NC II;, Masonry NC II; ug Cadetship alang sa mga Able-Bodied Seaman.

Kini samtang ang Primary Structures Corporation (PSC) ug ang School of Knowledge for Industrial Labor, Leadership and Service, Inc (SKILLS) pareho ang tumong, paghatag og dugang katakus sa mga kabatan-onan nga wala mag-eskwela, mga hingkod nga wala pay trabaho ug mga may kabilinggan nga interesado pa gihapon nga manginabuhi aron dili mahimong palas-anon sa pamilya.

Ang PSC usa ka Pinoy nga kompanya sa konstruksyon nga may mga kapin sa usa ka libo ka propesyonal nga trabahante nga nagseguro sa ilang pulido, dekalidad ug subay sa kontrata nga trabaho nga misulod sa Bohol niadtong 2011 ug may kapid-an n aka mga balay, konstruksyon, gam-anan og barko sa Buenavista ug batching plant sa Panglao nga nakahatag pangunsumo sa kapin sa 800 ka tawo.

Sa laing bahin, ang School of Knowledge for Industrial Labor, Leadership, and Services (SKILLS) usa ka pribadong institution nga nagtanyag og industry-relevant senior high school education ug technical vocational training, ug kini gidumala sa Primary Structures Educational Foundation, Inc. (PSEFI), usa ka pundasyon nga natukod niadtong 2008 ug corporate social responsibility arm sa Primary Group of Builders (PGB).

Sukad niadto, nakapa-accredit na kini sa TESDA, DEPED ubos sa PEAC, DSWD, BIR ug MARINA.

Ang duha ka kompanya, parehas nga may katakus sa paghatag og bag-ong skills nga gikinahanglan sa konstraksyon, turismo, maayong panglawas ug serbisyo sa kinabuhing pangbarko.

Segun sa SKILLS nga ang tanan nila nga training program, rehistrado na sa TESDA sa Sugbo ug kay nia na sila sa Bohol, naglaraw nga mopalapad niini dinhi.

Sa Bohol, kasamtangan nga usa pa ka skills training program: ang System Formworks Installation ang narehistro sa TESDA ug nagpadayon pa silang nagproseso sa mga requirements aron maaprobahan ang uban nilang training courses.

Tungod niini, kon magkasinabut sa Bohol, mahimo kining gastohan sa Bohol isip programang gipadagan una sa kompanya.

Apan, matud pa ni TESDA Bohol Director Engr Winefredo Salas, ang gipropose nga Memorandum of Understanding (MOU) usa ka maayong balita alang sa mga out-of-school youth, ug ilabi na kon ang SKILLS, marehistro na sa TESDA human ikaduso ngadto sa TESDA regional office ngadto sa National Office.

Kon masukip sa compendium of registered programs ug malista na, mahimo na nga kahatagan kini og allocation sa TESDA scholarships, aron dili na mogasto ang Bohol alang sa mga bansay.

Niini, gipaabut nga tugotan si Gov. Erico Aristotle C. Aumentado sa SP nga makalagda sa MOU, aron makasugod ang programa dinhi.

Ang sugyot sa bansay nga pagatugotan sa SP, gituki sa Committee on Education uban nila ni Board Members Lucille Y. Lagunay, Chairperson;. Greg Crispinito L. Jala, Vice Chairman ug Venzencio B. Arcamo, sakop. (RAHC/PIA7 Bohol)