LALA, Lanao del Norte (PIA) - - Malipayon ug mabulukong gisaulog kagahapon sa mga residente sa Lala, Lanao del Norte ang 74th nga Araw ng Lala ug  22nd Alimango Festival.

Human sa kapin tulog ka tuig tungod sa pandemya,   full blast na ang selebrasyon ug gibalik na ang street dancing competition diin lima ka mga eskwelahan ang nagtigi ug gibida ang  nagkalain-laing dance moves, costumes ug props nga alimango.

Naghatag  ang LGU ug tag-P105,000 sa mga partisipante isip budget sa kompetisyon.

Ang Christ the King College de Maranding ang gideklarang grand champion ug nakuha ang P70,000 nga cash prize. Giharos sab nila ang Most Disciplined Contingent, Best Choreography ug Best in Costume Awards.

Samtang, 1st runner up ang Lala National High School ug nakadaog ug P50,000 ug napili isip Most Lively Contingent.

Ang Lala School of Science and Technology Inc. ang 2nd runner up ug nakadaog og P30,000. Nakuha sab nila ang Best in Alimango Step ug  Best Festival Queen awards. 

“Ginainvite ta mo  para makabisita mo sa Lala. You are very much welcome sa munisipyo. Giawhag nako ang mga katawhan sa Lala nga magtinabangay, magsinabtanay lang ta para sa kalambuan sa atong munisipyo," sumala ni Mayor Angel “Tata” Yap.

Samtang, aduna sab mga sports activities sama sa sepak takraw, volleyball ug basketball.

“Daghan kaayo ang sports program namo mu-involve ug lain-laing sektor, nakita nako ang sports makapa-unify sa katawhan sa lungsod, labi na sa fraternities na makabuild ug lain laing relasyon makafellowship sa lain-laing grupo. Mao ang resulta maayo ang lakaw namo sa lungsod sa Lala," sumala ni Vice Mayor Cesar “Poloy” Yap Jr.

Aduna pud gipahigayon nga libreng check up, libreng alot, libreng pag-ibot sa ngipon ug libreng contraceptive implant subay sa selebrasyon. (LELA/PIA-10/Lanao del Norte)