ILIGAN CITY (PIA) --Giilia ang mga barangay sa Bonbonon, Hindang, Saray, Villaverde, Tipanoy, ug Poblacion  isip top performing  barangays nga nakab-ot ang tuberculosis (TB) reduction rates sa tuig 2022.

Gihatagan silag pag-ila  sa City Health Office  subay sa pagsaulog sa World TB Day aron pakusgon ang kahibalo sa publiko bahin sa  epekto sa TB.

Mokabat sa 130 ka barangay health workers gikan sa 44 ka barangay, nurses ug doctors ang misalmot sa maong kalihukan.

Ang CHO nakatala ug 288 ka bag-ong kaso sa TB. Ang treatment rate sa  maong sakit mukabat sa  90%.

Matod pa ni CHO head Dr. Glenn Manarpaac, mas daghan na ang mga pasyente sa TB nga nagpailawom sa konsultasyon tungod kay nahibawo na sila nga ang TB matambalan.

"Dumadami yung case natin because dumadami din naman yung napa-find natin at dumadami din yung nagpapakonsulta na, because slowly they are becoming aware nga ang TB dili angay nga ika-ulaw kundi angay siya nga matambalan aron mabalik sila sa ilahang kahimsog,” sumala niya.

“Nagkadaghan ang atong mga kaso kay mas daghan na ang atong na-detect nga mga pasyente ug mas daghang mga tawo karon ang nagpakonsulta sa ilang mga sintomas kay hinay-hinay na nilang nahibaw-an nga ang TB dili angay ikaulaw apan angayan kining tambalan aron mahibalik ang ilang maayong panglawas.)

Samtang, gidasig ni Bise Mayor Marianito Alemania ang mga pasyente nga dunay TB nga dili maulaw tungod sa ilang kahimtang. Kinahanglang mokonsulta dayon sila sa ilang kondisyon aron malikayan ang dugang pa nga impeksyon.

Sumala ni Rowena Enguito sa CHO,  ang mga pasyente sa TB   maka-avail ug libreng tambal gikan sa mga health center.

"Sa mga lumulupyo sa Iligan City, nga naa nay duha ka simana nga ubo ayaw mo kaulaw adto sa center, kay ang TB dili na angay ikaulaw. Ang TB is curable, so maayo gyud ta og madali nato nga magpacheck-up. Dili ta maulaw muadto sa atong health center, kay libre ang tambal ang X-ray wala moy bayaran,” sumala niya.  (LELA/PIA-10/Lanao del Norte)