CAGAYAN DE ORO CITY (PIA)--Gipatawag sa Department of Trade and Industry (DTI)-10 ang pipila ka mga regional line agencies, Marso 17, aron hisgotan ang pag-reactivate sa Consumer Network (ConsumerNet).
Ang ConsumerNet usa ka network sa mga ahensya sa gobyerno nga gitahasan sa pagpatuman sa mga balaod nga may kalabutan sa pagpanalipod sa mga konsumante.
Si Atty. Fel Lester Brillantes, hepe sa Consumer Protection Division sa DTI-10, niingon nga ang consumer network briefing gihimo aron sa pag-revitalize sa networking ug pagtinabangay sa mga nasangpit nga ahensya sa gobyerno ug pag-establisar og communication channels alang sa paspas ug hapsay nga aksyon sa mga isyu ug reklamo sa mga konsumante.
Iyang nahinumdoman nga ang pagmugna sa ConsumerNet unang gipaila sa nasud niadtong Nobyembre 1996 pinaagi sa memorandum of agreement nga gipirmahan sa mga miyembrong ahensya niini. Nianang panahona, ang network nagtumong sa pagpalambo sa kahibalo sa mga ahensya sa gobyerno nga gitahasan sa pagpanalipod sa mga konsumante ug pagtabang sa pagpadali sa pagsulbad sa mga reklamo sa mga konsumante.
Gipasiugda ni DTI-10 Assistant Regional Director Ruel Paclipan ang kamahinungdanon sa pagpaaktibo pag-usab sa Consumer Network sa Northern Mindanao aron makatabang sa pagsulbad sa mga isyu ug kabalaka nga may kalabotan sa consumerism.
"As government agencies with programs concerning consumer protection, we will have to work with one another, especially in the sharing of information," ingon niya.
[Isip mga ahensya sa gobyerno nga adunay mga programa bahin sa pagpanalipod sa mga konsumedor, kinahanglan nga magtinabangay kita, labi na sa pagpaambit sa kasayuran.]
Ang bag-ong gi-reactivate nga ConsumerNet miuyon nga dunay regular nga quarterly nga mga miting aron hisgutan ang mga isyu ug kabalaka nga may kalabotan sa mga konsumante ug mga espesyal nga miting alang sa mga isyu nga nanginahanglan dinaliang tubag.
Usa ka grupo sa Viber ang gimugna usab aron mapalig-on pa ang pagtinabangay sa mga miyembro niini.
Ang briefing gitambongan sa mga focal persons gikan sa National Food Authority, National Meat Inspection Service, Food and Drugs Administration, National Telecommunications Commission, Commission on Higher Education, Bureau of Fire Protection, Department of Environment and Natural Resources, Environmental Management Bureau, Department of Agriculture, Bureau of Fisheries and Aquatic Resources, Philippine Coconut Authority, Bangko Sentral ng Pilipinas, Bureau of Internal Revenue, Securities and Exchange Commission, Philippine Health Insurance Corporation, Department of Human Settlements and Urban Development, ug Philippine Information Agency. (APB/PIA-10)
