TAGBILARAN CITY, Bohol, March 21 (PIA) -- Giharos sa Bureau of Fire Protection (BFP) Region 7 ang dungog isip Champions sa bag-o lamang nga gitapos nga 7th National Fire Olympics (NFO) nga gihimo didto sa SM seaside, Syudad sa Sugbo.
Ikaduha ang Team NCR nga mingkuha usab sa kampionato sa Search and Rescue Attack ug Fire Hose Down Challenge, samtang ang Region 4B ang nahukmang labing promising team karon'g tuiga.
Ubos sa pangpanguna ni Fire Senior Superintendent (FSSupt) Rogelio Bungabong Jr., kinsa maoy officer-In-Charge sa rehiyon, gipakita sa mga kabumberohan sa Central Visayas ang hiniusang kusog, arong langkaton ang dungog ug ilhong labing hawod sa tanan nga mga bahan sa ka bumberoan sa tibuok nasud.
Sa 17 ka mga rehiyon nga gilangkoban sa mga bahan sa pinili nga sakop nga mingsalmot sa 7th NFO 2023, gihimo ang bangga sa BBM (BFP Bands Musiklaban), Female Fire ground Search and Rescue, Search and Rescue Attack (SARA), Tower Blitz, Fire Hose Down, ug Tug of War.
Champion ang BFP 7 sa Musiklaban, usa ka bangga sa awit nga alangcsa banda nga migamit usa sa tema sa buwan sa paglikay sa sunog: Sa pag-iwas sa sunog, hindi ka nag –iisa.
Ang Firewalls Band, nga gilangkoban sa mga bumbero sa nagkadaiyang Fire Station, mipukan sa ubang mga banda lakip na ang mga gikaintapang mga taga National Capital Region sa Luzon.
Second niini ang Region 8 ug third ang Region 12.
Gipakita usab ang kahanas sa kababayen-ang bumbero sa rehiyon sa Female Fireground Search and Rescue.
Sa Fire ground search and rescue, ang usa ka bahan kauban sa ilang team leader maghimo dayun og assessment base sa kadak-on ug kakusgon sa kalayo, sa labing paspas nga pagsulod, ug pagseguro kon pagpangita ba, pagluwas sa tawo sa sulod o paghipos sa kinsa man ugaling ang naangin sa kalayo.
Kini ang basehan sa plano nga gimoon sa sili pa mosulod ang breach team, subay usab sa kahimanan nga mahimong magamit sa sulod: andam nga ambulansya alang sa bumbero ug sa mga biktima.
Sa pagsulod sa nasunog nga building, gikinahanglan ang breaching tool, personal protective equipment nga may oxygen tank, himan sa komunikasyon ug ang fire hose nga mao usab giya sa paggawas sa nasunog nga building.
Gamiton didto ang primary ug secondary search techniques, ilabi na ko anaa na sa multi-storey buildings.
Kalakip usab niini ang pamaagi sa pagkuha sa mga biktima gikan sa sunog.
First Runner Up niini ang NCR ug second Runner Up ang BFP Caraga.
Labing hawod usab ang Region 7 sa Fire Tower Blitz.
Nagsunod sa Region 7 ang Region 4-A ug dayon ang BFP Caraga.
Ang ika 7 nga NFO 2023, nagsilbi nga natad aron ang tanan nga mga kabumberohan makapakita sa ilang mga kapasidad ug abilidad sa pagpugong sa kalayo ug sa pagtubag aron mapawong kini.
Sa usa ka pahayag sa social media, si BFP 7 chief Bungabong, mipasalamat sa iyang mga katawhan sa ilang paningkamot, pagkugi ug dedikasyon.
“To the men and women of BFP 7, thank you for the overwhelming support. The team couldn't have done this without your valuable input, cheer, and gestures,” dayag pa niya. (RAHC/PIA7 Bohol)
