DIPOLOG CITY, Mar. 31 (PIA) - 28 na lang ka adlaw ang nahabilin sa dili pa ang deadline sa pagparehistro sa SIM, ang Department of Information and Communications Technology (DICT) nag-awhag sa tanang dili rehistradong lungsoranon nga molihok na ug magparehistro sa ilang mga SIM sa labing daling panahon.

Sa pinakaulahing resulta nga gipagawas sa mga dagkong Public Telecommunication Entities (PTEs) — DITO Telecommunity Corp., Globe Telecom Inc., ug Smart Communications Inc. — niadtong Marso 28, 2023, ang gidaghanon sa mga rehistradong SIM mao ang mosunod: DITO – 4,074,477 ; Globe – 22,168,561; ug SMART – 27,281,690. Kini nagdala sa kinatibuk-ang ihap sa mga narehistro nga SIM ngadto sa 53,524,728, nga 31.68% sa 168,977,773 ka milyon nga subscribers sa tibuok nasud.

Dugang pa, gipahimangnoan sa DICT ang publiko nga magbantay sa mga entidad nga mahimong mosulay sa pagpahimulos sa nagsingabot nga deadline pinaagi sa pag tabang sa pagparehistro sa SIM. Ang uban mahimong magpakaaron-ingnon nga awtorisado nga mga representante sa gobyerno o mga PTE, apan adunay malisyosong intensiyon sa pagkuha sa personal nga impormasyon ug pagpanglimbong.

"Samtang nagkaduol kami sa Abril 26 nga deadline alang sa pagparehistro sa SIM, among giawhag ang tanan nga dili rehistrado nga mga lungsuranon nga magparehistro sa ilang mga SIM sa labing dali nga panahon aron malikayan ang kahasol sa pag-deactivate. Sa samang higayon, gipasidan-an  usab namo ang publiko nga magpabiling mabinantayon batok sa mga entidad nga mahimong mopahimulos sa takdang panahon sa pagpangilad sa mga tawo pinaagi sa pag tabang sa pagparehistro sa SIM. Ang imong kaluwasan ug seguridad mao ang among unang prayoridad, ug magpadayon kami sa pagtrabaho kauban ang mga PTE aron masiguro nga ang tanan nga mga SIM narehistro ug na-verify," matud ni DICT Undersecretary ug Spokesperson Anna Mae Y. Lamentillo.

Sa laing bahin, gipahinumdoman sa DICT ang publiko nga magparehistro sa ilang mga SIM sa ilang tagsa-tagsa ka PTE ug magmabinantayon sa ilang pagkompleto sa proseso sa pagparehistro. Importante nga magparehistro pinaagi sa opisyal nga mga link sa mga PTE aron malikayan ang mga pagpanglimbong nga mga kalihokan sama sa scam ug identity theft.
Pagrehistro lamang pinaagi sa opisyal nga mga link sa mga PTE:
• SMART - smart.com.ph/simreg o simreg.smart.com.ph
• GLOBE - new.globe.com.ph/simreg
• DITO - https://digital.dito.ph/pto/download/app
Alang sa mga reklamo ug kabalaka may kalabotan sa pagparehistro sa SIM, ang publiko mahimong mokontak sa hotline 1326. Alang sa dugang impormasyon bahin sa proseso sa pagparehistro sa SIM, ang publiko mahimong mobisita sa DICT website. Mahimo usab nimong maabot ang DICT pinaagi niining mga numero:
SMART: 0947 714 7105
GLOBE: 0966 976 5971
DITO: 0991 481 4225 (NBE/EDT/Irish R. Ansigot-OJT/PIA9-Zamboanga del Norte/with reports from DICT)