TAGBILARAN CITY, Bohol, April 2 (PIA) -- Gipangayo ni Gobernador Erico Aristotle Aumentado gikan sa Philippine Center for Postharvest Development and Mechanization (PhilMech) ang Rice Processing System 1, usa ka pakete sa teknolohiya sa panguma nga makatabang sa mga Bol-anong mag-uuma sa pagpakunhod sa usik ug pagdugang sa ilang kita.
Matud sa gobernador nga nangayo og pagtugot sa Sangguninang Panlalawigan alang sa resolusyon paghangyo sa PhilMech nga hatagan ang Bohol og mga himan sa pagproseso sa tipasi ngadto na sa bugas, nga nalangkob sa mga pwede nga ihatag sa goberno ubos sa Rice Competitiveness Enhancement Fund (RCEF) Mechanization Program.
Ang hangyo sa gobernador, agi usab sa pagpadayon sa tulo ka tuig nga programa sa RCEF-Mechanization, human madawat na usab sa Bohol ang mga tractors, transplanters, tillers, harvesters ug threshers nga nalakip sa unang tuig nga mga giprograma alang sa mechanization.
Alang sa 2022 ngadto sa 2024, ang PhilMech nagtutok sa pagpang-apud-apud sa postharvest technologies alang sa pagbuwad ug paggaling sa tipasi.
Kini ihatag ngadto sa mga kwalipekado nga kahugpungan sa mga mag-uuma ug mga local government units (LGUs), sama sa Bohol.
Pinaagi niini, kadtong mga naghumayan, mas aktibo pa sila nga makaapil sa rice value chain, aron mas motaas nga bili sa ilang halin kon mamaligya man sila og bulto o ginagmay.
Ang hangyo sa gobernador, dako og ikatabang sa mga mag-uuma nga migamit na lamng sa mga kadalanan ug mga basketbolan sa pagbuwad sa ilang ani, nga moresulta kanunay sa usik ug dili patas nga pagkauga.
Gitumong sa gobernador ang Rice Processing System I nga ngalangkob sa 2 ka units nga Recirculating Dryers ug usa ka unit sa Multi-pass Rice Mill.
Kini, matud pa nagkantidad og P16,454,000.
Tugbang niini, ang kagamhanang probinsyal sa Bohol, mogahin og 600 metros kwadrados nga bodega didto sa in Camambugan, Ubay ug ang pagpakutay sa koryente nga magamit sa galingan, nga gibanabana nga moabut sa P14,562,803.00.
Gawas sa tugbang nga pundo, gipahiluna na usab sa kagamhanan ang Certificate of Non-Coverage (CNC) application alang sa himoan pohon sa Rice Processing System 1.
Ang Certificate of Non-Coverage ipagawas sa Environmental Management Bureau (EMB) aron dili na kinahanglan pang magkuha og Environmental Clearance Certificate (ECC) tungod sa pagmatuod nga walay risko sa kalikopan sa pagtukod ug pagpatuman sa proyekto. (RAHC/PIA7 Bohol)
