FORT MAGSAYSAY, Nueva Ecija (PIA) -- Matibay na katuwang ng Pilipinas ang Estados Unidos sa pagpapalakas ng puwersa at pagkakaroon ng kasanayan sa paggamit ng mga bagong armas pandigma.
 
Personal na bumisita sina Philippine Army Commanding General Lieutenant General Romeo Brawner, Jr. at United States Army Pacific o USARPAC Commanding General Charles Flynn sa idinaos na live fire exercise ng Javelin Anti-Tank Weapon System sa kampo ng Fort Magsaysay sa Nueva Ecija na bahagi ng Balikatan Exercise ngayong taon.
 
Pahayag ni Brawner, ang natunghayang paggamit ng Javelin Weapon System ay isa sa mga capability development programs na sinisikap magkaroon ang Hukbong Katihan ng Pilipinas na magagamit sa pagpapalakas ng depensa at pagtatanggol sa teritoryo ng bansa. 
 
Ang naturang armas aniya ay pangunahing ginagamit na pantapat sa mga tangke at armored vehicle ng mga kalaban na kayang patamaan kahit nasa malayong distansiya.
 
Kaniya ring sinabi na bagama’t wala pang ganitong kagamitan ang bansa ay sinisimulan ng sanayin at mapamilyar ang mga kasudaluhan sa paggamit nito. 
 

Binigyang diin din ng kumander na ang mga ginagawang halimbawa o senaryo sa mga pagsasanay sa pagitan ng US at Philippine Army ay walang tinatarget na sinumang kalaban bagkus ay paghahanda para sa lahat ng uri ng banta na maaaring dumating sa Pilipinas tulad ng mga kalamidad o pangyayaring gawa ng tao. 
 
Ang Balikatan Exercise aniya ay hindi lamang nakatutok sa mga pagsasanay kontra sa mga kalabang may armas kundi  lalong mapaunlad ang kaalaman at kahandaang pagresponde sa iba’t ibang uri ng sakuna. 
 
Bago nagsimula ang Balikatan Exercise ay naunang idinaos ang SALAKNIB Exercise sa pagitan pa rin ng Philippine at US Army nitong Marso na ipagpapatuloy sa darating na Mayo.
 
Sinabi ni Brawner na ang lahat ng mga programa at aktibidad sa ilalim ng mga nabanggit na pagsasanay ay nakalinya sa mga bilin ni Pangulong Ferdinand Marcos, Jr. na ingatan at ipagtanggol ang buong teritoryong ng bansa na kung saan walang mawawala o ibibigay kahit maliit na pirasong pag-aari ng Pilipinas. 
 
Ayon naman kay Flynn, ang lahat ng mga pagsasanay na ginagawa ng mga kasundaluhan ng dalawang bansa ay bahagi ng kasunduan at pagkakaisa tungo sa pagkakaroon ng mapayapa, ligtas at bukas na Indo-Pacific Region. (CLJD/CCN-PIA 3)