QUEZON CITY, (PIA) --Lumagda sa isang kasunduan ang Pamahalaang Lungsod ng Pasig, Department of Natural Resources - National Capital Region (DENR-NCR), at Immaculate Conception Cathedral para sa implementasyon ng Heritage Tree Program sa lungsod.
Sa ilalim ng Heritage Tree Program, ang mga puno na matanda na, kaiba, native, o kaya endemic, na may minimum circumference na 100 centimeters at may sukat na one-half meter above ground ay maaaring maituring bilang "heritage tree" batay sa magiging nominasyon ng "host community" nito.
Sa kasunduan/programa nmakatatanggap ng proteksyon ang heritage tree mula sa foresters ng DENR-NCR para masiguro na mabubuhay nang mas matagal pa ang puno at mas mapakinabangan pa ito ng mga susunod pang henerasyon.
Tampok sa paglagda ng kasunduan ang paglalagay ng heritage tree marker sa puno ng Acacia na matatagpuan sa Pasig Catholic Cemetery.
Pinangunahan ni Pasig City Vice Mayor Dodot Jaworski ang pagpapasinaya bilang bahagi din ng ika-450 Araw ng Pasig at Month of Planet Earth/Earth Day.
Ayon sa pamahalaang lungsod, tinatayang nasa higit 100 taon na ang pinasinayaang puno ng acacia at nagsilbing saksi sa iba't ibang pangyayari bago pa man ang ika-20 siglo, kabilang ang Spanish-American war noong 1898 kung saan ang sementeryo noon ay nagsilbing kampo ng mga sundalong Amerikano.
