KAUSWAGAN, Lanao deo Norte (PIA) - -  Bibo ug mabulukon nga gisaulog sa mga residente ug turista  dinhi ang Hugyaw sa Kadagatan Festival  niadtong Abril 24. 

Ang selebrasyon gipahigayon atol sa 75th Foundation Day sa Kauswagan ug pista ni Senior San Vicente Ferrer.

“It is a celebration of bountiful harvest not only sa kadagatan but also for farming. We do this every year, a prelude activity towards our fiesta on April 25,” sumala ni Mayor Rommel Arnado.

Nagpanindotay sa nagkadaiyang dekorasyon sa gakit ang walo ka clusters sa trese ka mga  barangay sa lungsod. 

Giharos sa Barangay Libertad ang halos tanang kategorya sa kumpetisyon sa Hudyaka sa Kadagatan.

Sila ang kampyon sa  Sea Dancing competition ug nakadaog og P100,000  nga gisundan sa Cluster 3 - Barangay Poblacion isip 1st runner up. Tabla sab ang Cluster 1 - Barangay Tugar  ug Paiton ug Cluster 7 - Barangay Kawit Oriental ug Delabayan  sa 2nd runner up.

Alang sa gakit o float competition, nasungkit sab sa Barangay Libertad ang grand prize ug nakadaog og P200,000, 1st runner up ang Barangay Poblacion ug nadawat ang P150,000, samtang 2nd runner up sab ang Barangay Tugar ug Paiton ug nakuha ang P100,000.

Nagtabla sab ang Barangay Libertad ug Tacub alang sa street dancing competition.

Sa kinatibuk-an, nigahin og P1.3 milyon ang LGU  para sa grand ug consolacion prizes.

“Hinaot unta nga panalanginan ang lungsod sa Kauswagan sa atong patron nga si Senior San Vicente Ferrer,  hoping maenergize pa ug ma-strengthen pa nato ang hugot nga pag-ampo nga hinaot unta magpadayon ang atong kalinaw ug pag asenso diri sa lungsod sa Kauswagan,” sumala ni Arnado. 

Aduna sab ubang aktibidad ang gipahigayon sa week-long celebration sa lungsod sama sa first air show, color me fun run, job fair ug Ms. Hugyaw sa Kadagatan Festival. (LELA/PIA-10/Lanao del Norte)